Дар натиҷаи заминларза дар Чин 95 нафар ҳалок гардида, 130 нафар захмӣ шуданд

ДУШАНБЕ, 07.01.2025 /АМИТ «Ховар»/. Бар асари заминларза бо шиддати 6,8 дараҷа дар маҳаллаи Динжи (Тингри)-и шаҳри Шигатзеи ноҳияи мухтори Ситсзан (Чини Ҷанубу Ғарбӣ) 95 нафар ҳалок шуда, 130 нафари дигар ҷароҳатҳои гуногуни ҷисмонӣ бардоштанд. Дар ин хусус ситоди фавқулода оид ба бартарафнамоии оқибатҳои заминларза хабар додааст, иттилоъ медиҳад АМИТ «Ховар» бо истинод ба «Синхуа».

Раёсати зилзилашиносии Чин ба вокуниши изтирории сатҳи 2 шуруъ карда, барои кумак расонидан дар рафъи оқибатҳои офатҳои табиӣ ба минтақаи заминларза гурӯҳи корӣ фиристод.

Тибқи иттилои Маркази зилзилашиносии Чин, маркази заминларза дар нуқтаҳои 28,50-и дараҷаи арзи шимолӣ ва 87,45-и дараҷаи тӯли шарқӣ воқеъ будааст. Маркази манбаи зилзила дар умқи 10 километр ҷойгир гардидааст.

Маркази заминларза дар минтақаи Тсогои ноҳияи Динжи ҷойгир будааст.

АКС аз бойгонӣ