Дар ноҳияи Шаҳринав барои дар сатҳи баланд гузаронидани интихобот машварати омӯзишӣ доир шуд

ШАҲРИНАВ, 22.01.2025 /АМИТ «Ховар»/. 21 январ бо иштироки Раиси Кумитаи рушди маҳали назди Президенти Ҷумҳурии Тоҷикистон Шарифҷон Ҷумъазода, коршиносони Комиссияи марказии интихобот ва раъйпурсии Ҷумҳурии Тоҷикистон, аъзои комиссияҳои ҳавзавӣ ва участкаҳои интихоботии ноҳияи Шаҳринав машварати омӯзишӣ баргузор гардид. Дар ин хусус ба хабарнигори минтақавии АМИТ «Ховар» Субҳониддини Маҳмуд аз Мақомоти иҷроияи ҳокимияти давлатии ноҳияи Шаҳринав  иттилоъ доданд.

Дар машварат ҳозирин доир ба омодагии интихоботи вакилони Маҷлиси намояндагони Маҷлиси Олии Ҷумҳурии Тоҷикистон, маҷлисҳои вакилони халқи ноҳия ва ҷамоатҳои деҳот, тартиби ташкили участкаҳои интихоботӣ ва комиссияҳои участкавии интихоботӣ, фаъолияти комиссияҳои поёнии интихоботӣ, тартиб додани рӯйхати интихобкунандагон дар участкаҳои интихоботӣ, барои шиносоии умумӣ пешниҳод намудани рӯйхатҳо ва таъминоти моддию техникии комиссияҳои ҳавзавӣ ва участкавӣ сухан гуфта, ба саволҳои аъзои комиссияҳои ҳавзавӣ ва участкаҳои интихоботии ноҳияи Шаҳринав ҷавоб доданд.

Зимни машварат аз ҷониби аъзои Комиссияи марказии интихобот ва раъйпурсии Ҷумҳурии Тоҷикистон диққати иштирокчиён ба масъалаҳои нақшаҳои кории комиссияҳои ҳавзавӣ ва участкавӣ, шиору овезаҳо доир ба интихобот, баргузории ҷаласаҳои комиссияҳои поёнии интихоботӣ ва сари вақт баррасӣ намудани масъалаҳои дахлдор ҷалб карда шуд.

Ҳамчунин ҳайати гурӯҳи корӣ бо омодагии ҳавзаю участкаҳои интихоботии дар маҳалу мавзеъҳо ташкилшуда  аз наздик шинос гардида, барои сари вақт ислоҳу рафъ намудани норасоиҳои ҷойдошта дастуру тавсияҳои судманд доданд.

    АКС: Мақомоти иҷроияи ҳокимияти давлатии ноҳияи Шаҳринав