Дар Тоҷикобод мулоқоту суҳбатҳо бо сокинон бо усули «Деҳа ба деҳа» ва «Маҳалла ба маҳалла» идома доранд

ДУШАНБЕ, 05.01.2025 /АМИТ «Ховар»/. Дар ноҳияи Тоҷикобод бо мақсади шарҳу тавзеҳи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» гурӯҳҳои корӣ таъсис дода шуданд, ки онҳо бо усули «Деҳа ба деҳа» ва «Маҳалла ба маҳалла» бо сокинон суҳбату мулоқот анҷом медиҳанд. Чунин вохӯрӣ бо сокинони деҳаи Шинги Ҷамоати деҳоти Зарафшони ноҳия баргузор шуд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии ноҳияи Тоҷикобод.

Аъзои гурӯҳи корӣ дастуру супоришҳои Сарвари давлат муҳтарам Эмомалӣ Раҳмонро, ки дар Паёми имсолаи Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон баён гардиданд, ба сокинони деҳаи Шинг расонида, аз ҷумла иттилоъ доданд, ки то соли 2027 мардуми Тоҷикистон бо барқ таъмин гашта, мушкилоти дар ин самт ҷойдошта пурра бартараф мегардад.

Дар вохӯрӣ масъалаҳои вусъат бахшидани корҳои ободонию созандагӣ бахшида ба 35-солагии Истиқлоли давлатӣ, пешгирии шомилшавии ҷавонон ба ҳизбу ҳаракатҳои террористиву экстремистӣ, иҷрои қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» ва «Дар бораи масъулият барои таълиму тарбияи кӯдак» баррасӣ шуданд.

Дар вохӯрӣ сокинони деҳаи Шинг ибрози андеша намуда, ҷонибдории худро аз сиёсати инсондӯстона ва маорифпарваронаи Роҳбари давлат баён доштанд.

АКС: Мақомоти иҷроияи ҳокимияти давлатии ноҳияи Тоҷикобод