Донишгоҳи давлатии Бохтар соли 2024 ба даҳгонаи аввали муассисаҳои таҳсилоти олии касбии Тоҷикистон дохил гардид

ДУШАНБЕ, 06.01.2025. /АМИТ «Ховар»/. 3 январ дар Донишгоҳи давлатии Бохтар ба номи Носири Хусрав ҷаласаи васеи Шурои олимони донишгоҳ баргузор гардид, ки дар он фаъолияти таълимӣ-методӣ, илмӣ-таҳқиқотӣ, тарбиявӣ, робитаҳои байналмилалӣ ва молиявию хоҷагидории донишгоҳ дар соли 2024 натиҷагирӣ карда шуд. Дар ин хусус ба АМИТ «Ховар» дар Донишгоҳи давлатии Бохтар иттилоъ доданд.

Ректори донишгоҳ, доктори илмҳои иқтисодӣ, профессор Маҳмадалӣ Қурбонзода иброз дошт, ки тибқи раддабандии Агентии назорат дар соҳаи маориф ва илми назди Президенти Ҷумҳурии Тоҷикистон донишгоҳ дар байни муассисаҳои таҳсилоти олии касбии мамлакат дар соли 2024 ба даҳгонаи аввал дохил гардид.

Инчунин дар даври ниҳоии Озмуни ҷумҳуриявии «Фурӯғи субҳи доноӣ китоб аст» донишҷӯёни донишгоҳ бо гирифтани 3 ҷойи дуюм, 1 ҷойи сеюм ва 1 ҷойи ифтихорӣ байни муассисаҳои таҳсилоти олии мамлакат мақоми сеюмро касб карданд. Ҳамчунин дар Озмуни ҷумҳуриявии «Илм-фурӯғи маърифат» 2 ҷойи ифтихорӣ, дар Озмуни ҷумҳуриявии «Муҳаққиқ ва ихтироъкори ҷавон» 2 ҷойи сеюм ва 1 ҷойи ифтихорӣ ва дар олимпиадаи ҷумҳуриявӣ байни муассисаҳои таҳсилоти олии касбӣ 1 ҷойи дуюм ва 1 ҷойи сеюмро соҳиб шуданд.

Дар Фестивали мусобиқаҳои варзишӣ байни донишҷӯёни муассисаҳои таҳсилоти олии касбӣ донишҷӯёни донишгоҳ дар намуди гӯштини миллӣ 13 медал ва дар намуди варзиши сабук — волейбол соҳиби ҷойи аввал гардиданд.

Ҳамчунин байни донишҷӯёни муассисаҳои таҳсилоти олии касбии Ҷумҳурии Тоҷикистон мусобиқаи футбол миёни 62 даста баргузор гардид, ки донишҷӯёни Донишгоҳи давлатии Бохтар ҷойи аввалро соҳиб шуданд.

Ректори Донишгоҳи давлатии Бохтар барои ҳавасмандгардонии устодону донишҷӯён чанд пешниҳод манзур намуд:

1. Ба хотири Рӯзи ҷаҳонии футбол эълон гардидани 25 май Ҷоми раёсати Донишгоҳи давлатии Бохтар ба номи Носири Хусрав оид ба футбол байни омӯзгорону донишҷӯён таъсис дода шавад;
2. Вобаста ба тарғиби осори гаронмояи ҳаким Носири Хусрави Қубодиёнӣ аз рӯйи равияҳои табиӣ ва гуманитарӣ барои 6 донишҷӯ идрорпулии ба номи «Носири Хусрав» таъсис дода шавад;
3. Омӯзгорон барои дифои рисолаи докторӣ бо 20 ҳазор сомонӣ, барои дифои рисолаи номзадӣ дар равияи гуманитарӣ бо 5 ҳазор сомонӣ ва барои равияи илмҳои дақиқ, табиӣ ва риёзӣ бо 8 ҳазор сомонӣ ҳавасманд карда шаванд;
4. Ғолибони озмунҳои ҷумҳуриявӣ барои ҷойи 1-ум бо 15000 сомонӣ, ҷойи 2-юм бо 10000 сомонӣ ва ҷойи 3-юм бо 5000 сомонӣ ҳавасманд гардонида шаванд;
5. Дар заминаи дастгириҳои иҷтимоии Президенти Тоҷикистон, Пешвои миллат муҳтарам Эмомалӣ Раҳмон аз моҳи сентябри соли 2025 музди маоши кормандон 10 фоиз аз ҳисоби суратҳисоби махсуси донишгоҳ баланд бардошта шавад;
6. Муҳаққиқоне, ки дар Озмуни ҷумҳуриявии «Олими сол» сазовори ҷойи намоён мегарданд, ба маблағи 5000 сомонӣ қадрдонӣ карда шаванд.

АКС: Донишгоҳи давлатии Бохтар ба номи Носири Хусрав