Сафири Тоҷикистон бо вазири молия, вазири давлатӣ оид ба умури иқтисодӣ ва сармоягузории Давлати Кувайт мулоқот намуд

ДУШАНБЕ, 30.01.2025 /АМИТ «Ховар»/. 29 январ мулоқоти Сафири Фавқулода ва Мухтори Ҷумҳурии Тоҷикистон дар Давлати Кувайт Зубайдулло Зубайдзода бо вазири молия, вазири давлатӣ оид ба умури иқтисодӣ ва сармоягузории Давлати Кувайт Нура Сулаймон ал-Фассом, ки ҳамзамон ҳамраиси Комиссияи муштараки байниҳукуматии Тоҷикистон ва Кувайт мебошад, доир гардид.

Тавре АМИТ «Ховар» бо истинод ба Сафорати Ҷумҳурии Тоҷикистон дар Давлати Кувайт хабар медиҳад, дар мулоқот ҷонибҳо оид ба  татбиқи натиҷаҳои сафари расмии Президенти Ҷумҳурии Тоҷикистон муҳтарам Эмомалӣ Раҳмон ба Давлати Кувайт, ки дар он тақвияти равобит дар самтҳои иқтисод ва тиҷорат, ҷалби сармоягузорӣ, алалхусус афзоиш додани гардиши мол байни ду давлат таъкид гардида буд, табодули афкор намуданд.

Ҳамзамон омодагии ҷонибҳо барои дар сатҳи баланд баргузор намудани ҷаласаи чоруми Комиссияи муштараки Тоҷикистон ва Кувайт оид ба ҳамкории иқтисодӣ, тиҷоратӣ, илмӣ ва техникӣ, ки 4-6 феврали 2025 дар Кувайт ба нақша гирифта шудааст, баён гардид.

АКС: Сафорати Ҷумҳурии Тоҷикистон дар Давлати Кувайт