Байни Тоҷикистон ва Қатар ҳамкорӣ дар соҳаи кор бо ҷавонон ва варзиш тақвият меёбад

ДУШАНБЕ, 10.02.2025. /АМИТ «Ховар»/. 7 феврал Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноиби аввали Президенти Кумитаи миллии олимпии Тоҷикистон Зулфиқор Гулаҳмадзода дар шаҳри Ҳарбини Ҷумҳурии Мардумии Чин бо Президенти Кумитаи миллии олимпии Қатар, ноиби аввали Президенти Ассотсиатсияи кумитаҳои миллии олимпӣ (ANOC) Шайх Ҷоан бин Ҳамад Ал-Танӣ мулоқот намуд. Дар ин хусус ба АМИТ «Ховар» аз Кумитаи кор бо ҷавонон ва варзиш хабар доданд.

Зимни мулоқот ҷонибҳо роҳҳои густариши ҳамкории дуҷонибаро дар самти инкишофи варзиши олимпӣ – мубодилаи таҷриба дар омодасозии варзишгарон ба бозиҳои олимпӣ, барномаҳои ҳамкории ҷавонон – ташкили лагерҳои омӯзишӣ ва барномаҳои табодули таҷриба, таҳкими инфрасохтори варзишӣ – ҷалби сармоягузорӣ барои рушди иншооти варзишӣ дар Тоҷикистон ва иштирок дар мусобиқаҳои байналмилалӣ – ташкили чорабиниҳои муштарак ва иштироки фаъолонаи варзишгарони ҳарду давлат баррасӣ намуданд.

Ҳамзамон ҷонибҳо аҳамияти ҳамкории мутақобилро дар баланд бардоштани сатҳи омодагии варзишгарон ва рушди барномаҳои варзишӣ таъкид намуданд. Аз ҷумла, пешниҳод гардид, ки бо дастгирии Давлати Қатар дар Ҷумҳурии Тоҷикистон барномаҳои таълимии варзишӣ доир шуда, мутахассисони соҳа бо технологияҳои муосири тайёрии варзишгарон шинос шаванд.

Пешниҳод гардид, ки мубодилаи таҷриба байни мураббиён ва варзишгарони ҳарду давлат дар самти варзиш тавсеа ёфта, байни Ҷумҳурии Тоҷикистон ва Давлати Қатар мусобиқаҳои муштарак баргузор шаванд.

Мулоқот дар таҳкими ҳамкории варзишӣ байни Ҷумҳурии Тоҷикистон ва Давлати Қатар муҳим арзёбӣ гардида, барои рушди минбаъдаи равобити дуҷониба заминаи устувор фароҳам меорад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон