Бо роҳбарони намояндагиҳои дипломатии Тоҷикистон дар хориҷа нишасти корӣ баргузор гардид

ДУШАНБЕ, 26.02.2025 /АМИТ «Ховар»/. 25 феврал дар Вазорати корҳои хориҷӣ бо роҳбарии муовини якуми Сарвазири Ҷумҳурии Тоҷикистон Ҳоким Холиқзода бо иштироки роҳбарияти вазорату идораҳои дахлдори мамлакат ва роҳбарони намояндагиҳои дипломатии Ҷумҳурии Тоҷикистон дар хориҷи кишвар  тавассути видеоконференсия нишасти корӣ баргузор гардид.

Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, нишасти корӣ бо дастуру ҳидоятҳои Президенти Ҷумҳурии Тоҷикистон, Пешвои миллат  муҳтарам Эмомалӣ Раҳмон вобаста ба тақвияти фаъолият дар самти ҷалби сармояи хориҷӣ доир шуд.

Иштирокдорон масоили татбиқи ҳадафҳои стратегӣ, рушди соҳаҳои иқтисодӣ ва сайёҳӣ, инчунин ҳифзу муаррифии шоистаи мероси фарҳангию таърихии миллиро ба таври муфассал мавриди муҳокима қарор доданд.

Таъкид гардид, ки натиҷаҳои ин нишасти корӣ барои ноил шудан ба ҳадафҳои миллӣ, аз ҷумла рушду тавсеаи минбаъдаи ҳамкории иқтисодии хориҷӣ ва тақвияти мавқеи Тоҷикистон дар арсаи байналмилалӣ мусоидат менамоянд.

АКС: Вазорати корҳои хориҷии Ҷумҳурии Тоҷикистон