ДАР 28 ДАВЛАТИ ХОРИҶӢ-36 УЧАСТКАИ ИНТИХОБОТӢ. Вобаста ба тартиби овоздиҳӣ дар хориҷи Тоҷикистон маълумот дода шуд

ДУШАНБЕ, 07.02.2025. /АМИТ «Ховар»/. Бо ташаббуси Комиссияи марказии интихобот ва раъйпурсии Ҷумҳурии Тоҷикистон ва дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон вохӯрии роҳбарияти Комиссияи марказӣ бо аъзои маҳфилҳои «Дипломатони ҷавон» ва «Ҷавононе, ки дар хориҷи мамлакат таҳсил доранд»  баргузор гардид. Дар ин хусус ба АМИТ «Ховар» аз Комиссияи марказии интихобот ва раъйпурсӣ хабар доданд.

Роҳбарияти Комиссияи марказӣ ба иштирокчиёни вохӯрӣ дар бораи қонунгузории интихобот, ҳуқуқи интихоботӣ ва тартиби овоздиҳӣ дар хориҷи мамлакат иттилоъ дод. Аз ҷумла, иброз гардид, ки бо мақсади татбиқи ҳуқуқи интихоботии шаҳрвандоне, ки дар хориҷи мамлакат қарор доранд, дар назди намояндагиҳои Ҷумҳурии Тоҷикистон дар 28 давлати хориҷӣ 36 участкаи интихоботӣ таъсис дода шудааст.

Комиссияи марказии интихобот ва раъйпурсии Ҷумҳурии Тоҷикистон ҳамаи онҳоро бо маводи зарурии интихоботӣ таъмин намудааст.

Зимни вохӯрӣ донишҷӯёне, ки дар Федератсияи Русия, Ҷумҳурии Туркия ва Малайзия таҳсил мекунанд, ба тариқи онлайнӣ пайваст шуданд. Аз ҷумла, Беҳрӯз Ҳайдаров аз Федератсияи Русия дар суҳбати онлайнӣ иброз намуд, ки ҷавонон моҳияти иштирок дар интихоботро ба хубӣ дарк мекунанд ва азм гирифтаанд, ки дар он фаъолона иштирок намоянд.

АКС: Комиссияи марказии интихобот ва раъйпурсии Ҷумҳурии Тоҷикистон