Дар Норак даври шаҳрии озмуни вилоятии ҳарбӣ-варзишии «Ватанпарвар» ҷамъбаст шуд

ДУШАНБЕ, 20.02.2025 /АМИТ «Ховар»/. 18 феврал дар шаҳри Норак бахшида ба 32-солагии таъсиси Қувваҳои Мусаллаҳи Ҷумҳурии Тоҷикистон даври шаҳрии озмуни вилоятии ҳарбӣ-варзишии «Ватанпарвар» баргузор гардид, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Норак.

Озмун байни хонандагони муассисаҳои таълимии шаҳр баргузор шуда, мақсади он аз баланд бардоштани хештаншиносӣ, ҷасорат, зиракию тобоварӣ, дӯстию иттифоқ байни ҷавонон, азхуд намудани «Барномаи омодагии ибтидоии ҳарбӣ дар синфҳои болоӣ» ва омода намудани хонандагон ба дифои Ватан иборат буд.

Иброз гардид, ки баргузории чунин чорабиниҳо, ки моҳияти ватанпарастию ватандӯстона доранд, дар шароити ҷомеаи имрӯза хеле бамаврид аст. Он ҳамчунин барои омода намудани ҷавонон ба хизмат дар сафи Қувваҳои Мусаллаҳи ҷумҳурӣ нақши бағоят муассир дорад.

Дар озмун 18 гурӯҳ аз муассисаҳои таълимии шаҳр мувофиқи тамринҳои пешбинишуда ҳамаи шартҳои низомномаро иҷро намуданд.

Ғолибон ва иштирокчиёни фаъоли озмун бо Диплом ва медал қадршиносӣ шуданд.

АКС: Мақомоти иҷрояи ҳокимияти давлатии шаҳри Норак