Донишгоҳи давлатии Хуҷанд ҳамкориро бо муассисаҳои таълимӣ-илмии Олмон ва Фаронса тақвият медиҳад

ДУШАНБЕ, 28.02.2025 /АМИТ «Ховар»/. Зимни вохӯрии ректори Донишгоҳи давлатии Хуҷанд ба номи академик Бобоҷон Ғафуров Аюб Усмонзод бо  Сафири Ҷумҳурии Федеративии Олмон дар Тоҷикистон Йорк Шуграф ва Сафири Фаронса дар Тоҷикистон хонум Элза Пинёл масъалаи омодасозии кадрҳои ҷавобгӯ ба талаботи бозори меҳнат баррасӣ гардид. Дар ин хусус ба АМИТ «Ховар» дар ин донишгоҳ хабар доданд.

Аюб Усмонзода иброз дошт, ки ҳамкории илмӣ ва табодули таҷриба бо муассисаҳои таълимӣ ва илмии Олмон ва Фаронса яке аз роҳҳои густариш ва рушди робитаҳои байналмилалӣ мебошад. Дар доираи сиёсати дурнигаронаи сарони мамлакатҳо зарфияти мавҷудаи соҳаҳои муҳим, аз ҷумла илму маориф мақсаднок истифода гардида, ҳамкорӣ тақвият бахшида мешавад.

Меҳмонон ҳамзамон бо вазъи таълиму тадриси забонҳои олмонӣ  ва фаронсавӣ, имконияти мавҷуда, шароити азхудкунии дониши донишҷӯён ва синфхонаҳои таълимӣ, алоқаманд карда тавонистани назария ва амалияи муошират бо ин забон ва имконоти ҳавасмандкунии донишҷӯёни факултети забонҳои хориҷӣ шинос шуданд.

АКС: Донишгоҳи давлатии Хуҷанд ба номи академик Бобоҷон Ғафуров