ИНТИХОБОТИ ВАКИЛОНИ ХАЛҚ-2025. Иштирок дар интихобот нишонаи шинохти масъулияти шаҳрвандӣ аст

ДУШАНБЕ, 07.02.2025. /АМИТ «Ховар»/. Бо мақсади баланд бардоштани  сатҳи маърифати сиёсию ҳуқуқӣ ва фарҳанги интихоботии  шаҳрвандон аз ҷониби Комиссияи марказии интихобот ва раъйпурсии Ҷумҳурии Тоҷикистон 6 феврал дар Палатаи ҳисоби Ҷумҳурии Тоҷикистон ва Хадамоти гумруки назди Ҳукумати Ҷумҳурии Тоҷикистон вохӯрии аъзо ва коршиносони Комиссияи марказии интихобот ва раъйпурсӣ бо кормандони ин ниҳодҳо баргузор гардид. Дар ин хусус ба АМИТ «Ховар» аз Комиссияи марказии интихобот ва раъйпурсӣ хабар доданд.

Аъзои Комиссияи марказӣ Махфират Хидирзода вобаста ба моҳияти интихобот ҳамчун маъракаи сиёсӣ иброз дошт, ки «интихоботи озоду шаффоф яке аз василаҳои асосии татбиқи принсипи конститутсионӣ дар бораи моҳияти демократӣ доштани давлати Тоҷикистон мебошад».

Номбурда ёдовар шуд, ки ҳоло дар Тоҷикистон низоми интихоботии мувофиқ ба талаботи иҷтимоию сиёсии ҷомеа ташаккул ёфта, тавассути он ниҳодҳои мақомоти намояндагии мамлакат таъсис дода мешаванд.

Коршиноси Комиссияи марказӣ Некрӯз Қодирзода асосҳои қонунгузории интихоботии мамлакатро таҳлил намуда, вобаста ба масъалаи ҳуқуқи интихоботӣ, овоздиҳӣ, интихоб кардану интихоб шудан, вазъи ҳуқуқии номзад ва дигар масъалаҳои вобаста ба он ба иштирокчиён маълумот дод.

Таъкид шуд, ки таъминоти иттилоотии раванди интихобот яке аз масъалаҳои муҳими ташкилу баргузор намудани ин чорабинии муҳимми сиёсӣ мебошад.

АКС: Комиссияи марказии интихобот ва раъйпурсии Ҷумҳурии Тоҷикистон