Дар майдони 800-солагии Москваи шаҳри Душанбе ба муносибати ҷашни Наврӯз барномаи фарҳангӣ-фароғатӣ баргузор гардид

ДУШАНБЕ, 19.03.2025. /АМИТ «Ховар»/. 18 март дар майдони 800-солагии Москва бо ташаббуси Мақомоти иҷроияи ҳокимияти давлатии ноҳияи Шоҳмансури шаҳри Душанбе бахшида ба Ҷашни байналмилалии Наврӯз барномаи фарҳангӣ-фароғатӣ баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Шоҳмансур хабар доданд.

Қабл аз оғози намоиши идона иштирокчиён бо намоишгоҳи расму ойинҳои мардумӣ, дастранҷи деҳқонон, косибону оҳангарон ва таомҳои миллии хоси наврӯзӣ шинос шуданд.

Таъкид гардид, ки маҳз бо шарофати Истиқлоли давлатӣ ва иқдоми Президенти Ҷумҳурии Тоҷикистон муҳтарам Эмомалӣ Раҳмон ба мо муяссар гардид, ки Наврӯзи оламафрӯз- ин ҷашни  муқаддас ва файзбори ориёиро, ки давоми ҳазорсолаҳо ҳаёти маънавии миллати тоҷикро ғанӣ мегардонад, аз нав эҳё ва ба ҷаҳониён муаррифӣ намоем.

Имрӯз бо ифтихор ва шодмонӣ метавон гуфт, ки Наврӯз чун пештара ҷойгоҳи худро соҳиб гардида, дар саросари ҷаҳон бо шукуҳу шаҳомати хосса таҷлил карда мешавад. Эҳёи расму оинҳои накӯи Наврӯз ва тарғибу ташвиқи шоистаи он дар ҷумҳурӣ ва берун аз он собит менамояд, ки Тоҷикистон Ватани Наврӯз ва ворису посдори ин суннати пурифтихори бостонӣ аст.

АКС: Мақомоти иҷроияи ҳокимияти давлатии ноҳияи Шоҳмансур