Дар шаҳри Турсунзода Маркази саломатии деҳавии «Саркор» ба истифода дода шуд

ТУРСУНЗОДА, 30.03.2025 /АМИТ «Ховар»/. Дар доираи таҷлили Ҷашни байналмилалии Наврӯз дар Ҷамоати деҳоти Турсун Тӯйчиеви шаҳри Турсунзода бо иштироки меҳмонону роҳбарияти шаҳр ва сокинони ҷамоат Маркази саломатии деҳавии «Саркор» мавриди истифода қарор дода шуд.  Дар ин хусус  ба хабарнигори АМИТ «Ховар» аз Мақомоти иҷроияи ҳокимияти давлатии шаҳри Турсунзода  иттилоъ доданд.

Маркази саломатии деҳавии «Саркор» бо дастгирии Мақомоти иҷроияи ҳокимияти давлатии шаҳри Турсунзода ва маблағгузории ҶДММ «Сардор-2008»  бунёд гардидааст. Он аз 18 ҳуҷра ва як маҷлисгоҳ иборат буда, утоқҳои корӣ бо таҷҳизоти нави тиббӣ, мизу курсӣ ва ҷевонҳои замонавӣ муҷаҳҳаз мебошанд. 20 корманди ин маркази саломатӣ ба 14 101 нафар сокинони 8 деҳаи ҷамоат  хизмати тиббӣ мерасонанд.

Бинои нави муассисаи тандурустӣ дорои шароити муосири ташхису табобат буда, ба баланд бардоштани сатҳи хизматрасониии тиббӣ ба аҳолӣ нигаронида шудааст.

Бахшида ба ҷашни таърихии Наврӯз дар шаҳри Турсунзода ҳамчунин биноҳои баландошёнаи истиқоматӣ, марказҳои хизматрасонӣ ва дигар намуди иншоот ба истифода дода шуданд.

АКС: Мақомоти иҷроияи ҳокимияти давлатии шаҳри Турсунзода