Иқдоми ҷумҳуриявии «Тоҷикона мепӯшем» ба пешгирии тақлид ба фарҳанги бегона мусоидат менамояд

ДУШАНБЕ, 27.03.2025. /АМИТ «Ховар»/. Бо фаро расидани фасли зебои баҳор соли 7-ум аст, ки дар мамлакат аз 1 март то 31 май иқдоми ҷумҳуриявии тарғиботӣ — ташвиқотии «Тоҷикона мепӯшем» баргузор мегардад.

Ин иқдом имрӯзҳо дар саросари мамлакат идома дошта, дар доираи он занону духтарон ҳамарӯза либосии миллӣ ба бар менамоянд.

Иқдом аз ҷониби Кумитаи кор бо занон ва оилаи назди Ҳукумати Ҷумҳурии Тоҷикистон бо мақсади арҷ гузоштан ба фарҳанги миллӣ, тарғиби либоси миллӣ ва муосиргардонии он гузаронида мешавад.

Муовини сардори раёсати кор бо оилаи Кумитаи кор бо занон ва оилаи назди Ҳукумати Ҷумҳурии Тоҷикистон Боғигул Исломзода иброз дошт, ки мақсад аз баргузор намудани ин иқдом арҷ гузоштан ба фарҳанг ва либоси миллӣ, тарбия намудани ҳисси зебоипарастӣ дар ниҳоди ҷавондухтарон, баланд бардоштани шавқу ҳаваси онҳо ба либоси миллӣ, ҳамчунин пешгирӣ намудани гаравидан ба фарҳанги бегона мебошад.

Бояд гуфт, ки симои зан-модари тоҷик ҳамеша бо либоси миллӣ пеши назар меояд, зеро онҳо дар ҳар давру замон посдори урфу одат ва анъанаҳои муқаддаси халқу миллат мебошанд.

Президенти Ҷумҳурии Тоҷикистон муҳтарам Эмомалӣ Раҳмон 7 марти соли равон дар ҷамъомади тантанавӣ ба муносибати Рӯзи Модар аз занону ҷавондухтарон даъват ба амал оварданд, ки «либосҳои зебову шинами миллии худамонро, ки дар ҳамаи давру замонҳо зинатбахши занону модарони тоҷик буданд ва ифодакунандаи ҳайсияту иффати онҳо маҳсуб меёфтанд, тарк накунед. Бахусус, дар фасли баҳор, аз ҳамин рӯзҳо сар карда, хурду бузург либоси миллӣ ба бар кунед ва ифтихор дошта бошед, ки атласу адрас ва чакани тоҷикии мо ҷаҳонӣ шудааст».

Ба андешаи ҳамсуҳбати мо, яке аз ҳадафҳои дигари баргузор намудани иқдоми ҷумҳуриявии «Тоҷикона мепӯшем»- ин ҷалб намудани тарроҳону чеварон ба муосиргардонии либоси миллӣ мебошад.

«Имрӯз, ки ҳифз ва нигоҳдошти либосӣ миллӣ яке аз масъалаҳои муҳим ба ҳисоб меравад, ба воситаи ин гуна ҳамоишҳои дохиливу байналмилалӣ мо метавонем либоси миллиамонро муаррифӣ намоем. Мушоҳидаҳо зимни баргузории ҳамоишҳо нишон медиҳанд, ки аксари тарроҳон ва чеварон аллакай дарк намудаанд, ки дар замони имрӯз либосҳои миллиро бо кадом тарҳ бояд пешниҳод намоянд. Онҳо либосҳоеро пешниҳоди омма мегардонанд, ки воқеан ҳам бо тарҳи муосир дӯхта шуда, ба хусусияти хоси либоси миллии мардуми тоҷик ҷавобгӯ мебошанд»,-гуфт Боғигул Исломзода.

Тавре мушоҳидаҳо нишон медиҳанд, имрӯзҳо дар кӯчаҳои пойтахт ва шаҳру ноҳияҳои ҷумҳурӣ занону духтарон либоси миллӣ ба бар намудаанд, ки ин метавонад дар шароити ҷаҳонишавӣ фарҳанги миллӣ ва нуфузи Тоҷикистонро ҳифз намояд. Пӯшидани либоси миллӣ шиддати воридшавии либосҳо ва фарҳанги бегонаро ба мамлакат паст менамояд.

Ёдовар мешавем, ки соли равон ҳамчунин «Дастурамали либосҳои тавсиявӣ барои духтарон ва занони Тоҷикистон» нашр ва дастрас мегардад. Ин дастурамал аз 16 боб иборат буда, либосҳои тавсиявии он аз наврасони 7-сола оғоз мешаванд. Дастурамал хусусияти тавсиявӣ дошта, бо мақсади ба танзим даровардани тарзи либоспӯшии миллӣ пешниҳод гардидааст. Ба андешаи фарҳангшиносон, он пеши роҳи хурофоту бегонапарастиро гирифта, воситаи муҳими тарғиби либосҳои муосири миллӣ ва муаррифи миллату мамлакат мегардад.

Бояд гуфт, ки ба китоби «Дастурамали либосҳои тавсиявӣ барои духтарон ва занони Тоҷикистон», ки соли 2018 тасдиқ ва нашр гардида буд, иловаҳо ворид гардида, ба нашр мерасад.

Ёдовар мешавем, ки иқдоми ҷумҳуриявии «Тоҷикона мепӯшем» тибқи дастуру супоришҳои Пешвои миллат муҳтарам Эмомалӣ Раҳмон ба хотири арҷ гузоштан ба фарҳанги миллӣ, анъанаҳои неки аҷдодӣ, махсусан либоси миллӣ, атласу адрас, чакан, баланд бардоштани фарҳанги либоспӯшӣ, таблиғу ташвиқи либоси миллӣ ва аз байн бурдани тамоюли бегонапарастӣ амалӣ мегардад.

Моҳинави НАВРӮЗ,
АМИТ «Ховар»

АКС: АМИТ«Ховар»