Тоҷикистон ва Қирғизистон дар самти таъмини базилзилатобоварии биноҳо ва иншоот Ёддошти тафоҳум ба имзо расониданд

ДУШАНБЕ, 13.03.2025. /АМИТ «Ховар»/. Имрӯз аз рӯйи натиҷаҳои гуфтушунидҳои сарони давлатҳои Тоҷикистон ва Қирғизистон маросими имзои 16 санади нави ҳамкорӣ доир гардид.

Ёддошти тафоҳум байни Кумитаи меъморӣ ва сохтмони назди Ҳукумати Ҷумҳурии Тоҷикистон ва Агентии давлатии меъморӣ, сохтмон ва хоҷагии манзилию коммуналии назди Девони вазирони Ҷумҳурии Қирғизистон оид ба ҳамкорӣ дар самти таъмини тобоварӣ ба зилзила, рушди технологияҳои самаранокии энергияи «сабз» ва шаҳрсозӣ, инчунин рақамикунонии раванди сохтмон аз ҷумлаи ин санадҳои ҳамкории дуҷониба мебошад.

Тавре ба АМИТ «Ховар» аз Кумитаи меъморӣ ва сохтмони назди Ҳукумати Ҷумҳурии Тоҷикистон хабар доданд, дар доираи ин Ёддошти тафоҳум ҷонибҳо дар самти таъмини базилзилатобоварии биноҳо ва иншоот, рушди технологияҳои самаранокии энергияи «сабз» дар сохтмон, такмили шаҳрсозӣ ва истифодаи усулҳои муосири банақшагирӣ, рушди лоиҳаҳои муштарак оид ба навсозӣ ҳамкорӣ менамоянд.

Ҳамзамон дар доираи татбиқи ин санад ҷонибҳо нақшаи чорабиниҳои муштарак  (харитаи роҳ)-ро барои таҳкими ҳамкорӣ ва ноил шудан ба ҳадафҳои гузошта таҳия менамоянд.

Ҷонибҳо ҳамзамон ба нақша гирифтаанд, ки бо иштироки мутахассисони якдигар намоишгоҳҳои байналмилалӣ, форумҳо, мизҳои мудаввар ва дигар чорабиниҳо доир намуда, дар ин самтҳо таҳқиқот ва корҳои муштарак анҷом диҳанд.

АКС: Хадамоти матбуоти Президенти Ҷумҳурии Тоҷикистон