Боғи фарҳангию фароғатии «Аҳмади Дониш»-и шаҳри Душанбе беҳтарин боғ дар соли 2025 дониста шуд

Апрель 29, 2025 14:52

ДУШАНБЕ, 29.04.2025. /АМИТ «Ховар»/. Тавре қаблан иттилоъ додем, Боғи фарҳангию фароғатии «Аҳмади Дониш»-и шаҳри Душанбе 26 апрел дар ҷамъбасти Фестивали гулҳо таҳти унвони «Сайри гули лола»  аз рӯи номинатсияи «боғҳои фарҳангию фароғатӣ» сазовори  ҷойи якум ва Дипломи озмун гардид. Дар ин хусус ба АМИТ «Ховар» аз Корхонаи воҳиди давлатии «Роҳи оҳани Тоҷикистон» иттилоъ доданд.

Бунёди  Боғи фарҳангию фароғатии «Аҳмади Дониш»-и шаҳри Душанбе моҳи ноябри соли 2017 оғоз гардида, 25 сентябри соли 2018 бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ мавриди истифода қарор дода шудаст. Боғ аз ҷониби  Корхонаи воҳиди давлатии «Роҳи оҳани Тоҷикистон» дар майдони наздик  ба  3 гектар бунёд карда шудааст. Корҳои вобаста ба сарсабзу хуррамгардонии Боғи ба номи Аҳмади Дониш дар асоси тарҳи хос бо завқи баланд амалӣ гардидаанд.

Боғи фарҳангию фароғатии «Аҳмади Дониш», ки дар муддати камтар аз як сол дар хиёбони Рӯдакӣ бо тарҳи хеле зебо бунёд карда шудаст, ҳоло ба яке аз маконҳои асосии  истироҳатию фароғатии  сокинон ва меҳмонони пойтахти Тоҷикистон- шаҳри Душанбе табдил ёфтааст.

Дар боғ тибқи  дастуру супоришҳо ва роҳнамоиҳои Пешвои миллат муҳтарам Эмомалӣ Раҳмон  қариб 1000 бех дарахтони нодири сояафкану ороишӣ, ки бештарашон  аз хориҷи мамлакат ворид карда шудааст, шинонида шудаанд. Мақсад аз бунёди ин боғ фароҳам овардани шароити мусоиди сайру тамошо ва истироҳату фарғоғат  барои меҳмонону сокинони пойтахти мамлакат мебошад.

Дар Боғи фарҳангию фароғатии «Аҳмади Дониш»  зиёда аз 11 ҳазору 500 метри мураббаъ роҳравҳо сафолакпӯш шуда, 12 ҳазор метри муррабаъ майсазор гардонида шудааст. Барои чароғонкунии боғ 225 сутунпояи аз 4 то 9-метра ва шумораи зиёди дастгоҳу таҷҳизоти муосири равшанидиҳанда насб карда шудаанд, ки ҳудуди ин иншооти фарҳангӣ-фароғатиро шабонгоҳ хеле ҷолибу назаррабо менамоянд.

Ҳамчунин дар ҳудуди Боғи фарҳангию фароғатии «Аҳмади Дониш» ҷой барои бозии кӯдакону наврасон бунёд карда шудааст, ки дорои аттраксионҳо ва бозичаҳои худҳаракаткунанда мебошад. Масоҳати умумии ин қитъа 1238 метри мураббаъ буда, таҷҳизоти он асосан аз Туркия ва Италия ворид карда шудаанд.

Дар ҳудуди боғ пайваста рӯзҳои истироҳатӣ аз ҷониби кормандони Корхонаи воҳиди давлатии «Роҳи оҳани Тоҷикистон» тадбирҳои ободонию тозакорӣ гузаронида шуда, канори роҳравҳои асосии он ва ҳудуди боғ гулкорию сабзазор карда мешаванд.

Дар ин мавсим  Боғи фарҳангию фароғатии «Аҳмади Дониш» дар ноҳияи Исмоили Сомонӣ ва шаҳри Душанбе низ дар номинатсияи беҳтарин боғ сазовори ҷойи якум гардид.

 

АКС: Корхонаи воҳиди давлатии «Роҳи оҳани Тоҷикистон»

Апрель 29, 2025 14:52

Хабарҳои дигари ин бахш

Дар шаҳраку маҳаллаҳои ноҳияҳои Душанбе озмунҳои «Беҳтарин ҳамсар» ва «Фарзанд – боғи падару модар» гузаронида шуданд
Дар асоси қарори Раиси шаҳри Душанбе дар пойтахт намоишгоҳи фурӯши либосҳои мактабӣ ва лавозимоти дарсӣ оғоз гардид
Доир ба муқовимат ба коррупсия чун кафили рушди соҳаи маориф конференсия баргузор гардид
Бахшида ба Рӯзи варзишгарони Тоҷикистон дар Душанбе Марафони велосипедронӣ баргузор мегардад
Дар шаҳри Душанбе 34-солагии Истиқлолияти давлатӣ ботантана ҷашн гирифта мешавад
Соли 2025 ба шаҳри Душанбе беш аз 450 ҳазор сайёҳ ворид гардид
Ба шаҳри Душанбе зиёда аз 11 ҳазор электромобил ворид карда шудааст
Соли 2025 дар шаҳри Душанбе 16 муассисаи таълимӣ ба истифода дода мешавад
НИШАСТИ МАТБУОТӢ. Дар ҳудуди шаҳри Душанбе сохтмони 7 эстакадаи нав оғоз меёбад
НИШАСТИ МАТБУОТӢ. Дар ноҳияи Сино сохтмон ва навсозии 279 иншоот ба нақша гирифта шудааст
НИШАСТИ МАТБУОТӢ. Корхонаҳои саноатии ноҳияи Фирдавсӣ ба маблағи зиёда аз 882 миллион сомонӣ маҳсулот истеҳсол намуданд
НИШАСТИ МАТБУОТӢ. Варзишгарони ноҳияи Исмоили Сомонии пойтахт дар мусобиқаҳо соҳиби 1620 медал шуданд