Дар Донишгоҳи давлатии молия ва иқтисоди Тоҷикистон озмуни «Фурӯғи субҳи доноӣ китоб аст» доир шуд

ДУШАНБЕ, 05.04.2025 /АМИТ «Ховар»/. 3 апрел дар Донишгоҳи давлатии молия ва иқтисоди Тоҷикистон даври муассисавии Озмуни ҷумҳуриявии «Фурӯғи субҳи доноӣ китоб аст» баргузор шуд, хабар медиҳад АМИТ «Ховар» бо истинод ба ин донишгоҳ.

Зимни ифтитоҳи озмун доир ба омодагии омӯзгорону донишҷӯён, тарғибу ташвиқи илму маърифат, китобу китобхонӣ, боло бурдани худшиносию худогоҳӣ, ватандӯстӣ ва маънавиятпарварии ҷавонон ибрози андеша карда шуд. Гуфта шуд, ки баргузории озмун дар тарбияи маънавию ахлоқии ҷавонон нақши муассир мегузорад.

Иштирокдорони озмун аз рӯи номинатсияҳои адабиёти классикӣ, адабиёти ҷаҳон ва адабиёти муосир донишу маҳорат ва малакаи хуб нишон доданд. Ҳайати ҳакамон суханронию шеърхонӣ ва посухи иштирокдоронро баррасӣ намуда, бо онҳо маслиҳатҳои муфид доданд.

Дар фарҷом ғолибон муайян шуда, ба даври ноҳиявӣ роҳ ёфтанд.

АКС: Донишгоҳи давлатии молия ва иқтисоди Тоҷикистон