Дар Хуҷанд даври якуми Озмуни ҷумҳуриявии «Малакаи касбӣ» баргузор шуд

ДУШАНБЕ, 13.04.202 /АМИТ «Ховар»/. 10-11 апрел дар Литсейи касбӣ-техникии сохтмонии шаҳри Хуҷанд даври вилоятии Озмуни ҷумҳуриявии «Малакаи касбӣ» байни муассисаҳои таҳсилоти ибтидоии касбии шаҳру ноҳияҳои Хуҷанд, Бобоҷон Ғафуров, Мастчоҳ, Истиқлол, Исфара, Конибодом ва Ашт баргузор гардид. Дар ин хусус АМИТ «Ховар» бо истинод ба Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон хабар медиҳад.

Дар озмун аз 12 муассиса 250 хонанда аз рӯи 15 ихтисос фаъолона иштирок намуда, баъди ҷамъбасти натиҷаи имтиҳон ғолибон ба даври ҷумҳуриявӣ роҳхат мегиранд.

Озмуни ҷумҳуриявии «Малакаи касбӣ» ҳамасола дар байни хонандагони муассисаҳои таҳсилоти ибтидоии касбии ҷумҳурӣ аз рӯйи 15 ихтисос, аз ҷумла барқчӣ оид ба таъмири қисмҳои барқии автомобил, челонгар оид ба таъмири муҳаррики автомобил, кафшергари барқию газӣ, ҳисобдор бо донистани компютер, системаи компютерӣ ва интернет-технология, дуредгар, дӯзанда, монтёри барқ оид ба таъмир ва хизматрасонии таҷҳизоти барқӣ, тракторчӣ-мошинисти истеҳсолоти кишоварзӣ ва челонгар оид ба тайёр намудани ҷузъҳо ва қисмҳои техникӣ-санитарӣ гузаронида мешавад.

Озмун дар ду давр баргузор шуда, хонандагон аз рӯи фанни таълимӣ тест супорида, аз рӯи ихтисос маҳорат нишон медиҳанд.

Даври ҷумҳуриявии озмун 15-16 май дар шаҳри Душанбе баргузор мешавад.

 АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон