Дар Русия Форуми 3-юми рақамӣ оид ба соҳаи тандурустӣ доир шуд

ДУШАНБЕ, 19.04.2025. /АМИТ «Ховар»/.  Аз 16 то 18  апрел дар вилояти Сахалини Федератсияи Русия Форуми 3-юми рақамӣ бо иштироки намояндагони вазоратҳои тандурустии давлатҳои Тоҷикистон, Русия, Беларус ва Қирғизистон баргузор гардид.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  ба АМИТ «Ховар» иттилоъ доданд, форуми рақамӣ таҳти унвони «Саломатии аҳолӣ ҳамчун нишондиҳандаи рушди иҷтимоию иқтисодии вилоят ва мамлакат» доир шуд.

Дар форум директори Маркази омор ва иттилооти тиббии Вазорати тандурустӣ ва ҳифзи иҷтимоии аҳолӣ Манучеҳр Шамсуллозода дар мавзуи «Рақамикунонии соҳаи тандурустӣ дар Тоҷикистон: Роҳ ба сӯи хизматрасонии босифат ва ояндаи устувор» маъруза намуд.

Гуфта шуд, ки дар Тоҷикистон рақамикунонии соҳаи тандурустӣ дар марҳилаи рушд қарор дошта, барои гузаштан ба системаи электронии сабти маълумот корҳои назаррас ба анҷом расонида шудаанд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон