Дар шаҳри Душанбе Мусобиқаи «Дави дӯстӣ» баргузор гардид

ДУШАНБЕ, 07.04.2025. /АМИТ «Ховар»/. Имрӯз дар доираи баргузории Форуми минтақавии Шӯрои олимпии Осиё ва ҳамбастагии олимпӣ барои кумитаҳои миллии олимпии Осиёи Марказӣ ва Осиёи Ғарбӣ дар шафати Боғи фарҳангию фароғатии «Кӯли ҷавонон»- и пойтахт байни иштирокчиёни форум «Дави дӯстӣ» баргузор гардид. Дар ин хусус ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Дар «Дави дӯстӣ» намояндагони ҳайатҳои 22 давлати иштирокдори Форум иштирок намуданд. Зимни ифтитоҳи мусобиқа таъкид гардид, ки мақсад аз ташкили «Дави дӯстӣ» (Fun Run) тарғиби тарзи ҳайёти солим, оммавигардонии варзиш ва таҳкими дӯстӣ байни ҳайатҳои иштирокчии ин чорабинии бошукӯҳи байналмилалӣ мебошад.

Дар доираи ин чорабинии варзишӣ аз ҷониби Кумитаи тадорукот як зумра ҷавонони фаъол ва ғолибони озмунҳое, ки раёсати Форум дар самтҳои алоҳида баргузор намуд, дар фазои тантанавӣ бо шаҳодатнома, медал ва дигар туҳфаҳои хотиравӣ қадршиносӣ гардиданд.

Ёдовар мешавем, ки 6 апрели соли равон дар шаҳри Душанбе Форуми Шурои олимпии Осиё ва ҳамбастагии олимпӣ оғоз гардид, ки дар он варзишгарону роҳбарони сохторҳои варзишии зиёда аз 22 давлати Осиёи Марказӣ ва Осиёи Ғарбӣ иштирок намуданд.

Хотиррасон менамоем, ки дар ҷаласаи Форум масъалаҳои сеюмин Бозиҳои Осиё байни наврасон дар давлати Баҳрайн, Бозиҳои Осиё дар толор ва ҳунарҳои размӣ дар Ар – Риёзи Арабистони Саудӣ – 2026, 20-умин Бозиҳои Осиё дар Айчӣ – Ногояи Ҷопон – 2026, барномаҳои Кумитаи байналмилалии олимпӣ ва омода намудани варзишгарон барои Бозиҳои олимпии Лос – Анҷелес — 2028 мавриди баррасӣ қарор гирифтанд.

Ёдовар мешавем, ки Форум то 8 апрел идома ёфта, иштирокдорони он мавзеъҳои таърихию фарҳангии шаҳри Душанберо тамошо менамоянд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон