Дар Тоҷикистон нақшаи даъвати баҳорӣ ба сафи Артиши миллӣ беш аз 80 фоиз иҷро шуд

ДУШАНБЕ, 11.04.2025. /АМИТ «Ховар»/. Аз оғози даъвати баҳории шаҳрвандон ба хизмати ҳатмии ҳарбӣ 10 рӯз сипарӣ гардид. Дар ин муддат Вилояти Мухтори Кӯҳистони Бадахшон, вилояти Хатлон минтақаи Рашт ва шаҳри Душанбе дар сатҳи ҷумҳурӣ аз иҷрои нақшаи пешбинишуда гузориш дода, ин чорабинии муҳими сиёсӣ-ҷамъиятиро бо дарки баланди масъулияти шаҳрвандӣ ва сатҳу сифати баланд ба анҷом расониданд.

Тавре ба АМИТ «Ховар» аз Вазорати мудофиаи Ҷумҳурии Тоҷикистон хабар доданд, иҷрои нақшаи даъвати баҳории шаҳрвандон ба хизмати ҳатмии ҳарбӣ дар даҳаи аввали ин моҳ дар тамоми шаҳру ноҳияҳои Ҷумҳурии Тоҷикистон дар маҷмуъ беш аз 80 фоизро ташкил дод.

Дар даҳрӯзаи аввал аз байни 13 шаҳру ноҳияҳои тобеи ҷумҳурӣ ноҳияҳои Рашт, Сангвор, Лахш, Нуробод ва Тоҷикобод аввалин шуда, нақшаро иҷро намуданд. Ин ноҳияҳо чанд соли охир аст, ки дар сатҳи ҷумҳурӣ дар баробари Вилояти Мухтори Кӯҳистони Бадахшон аз ҷумлаи аввалин иҷрокунандагони нақшаи даъват мебошанд. Ҳоло иҷрои нақша дар шаҳру ноҳияҳои тобеи ҷумҳурӣ ба 72 фоиз баробар гардидааст.

Давоми 10 рӯзи ҷараёни ин маъракаи муҳим дар вилояти Суғд иҷрои нақша 54 фоизро ташкил дод. Дар вилоят ноҳияи Кӯҳистони Масчоҳ аз аввалинҳо шуда, нақшаи пешбинишударо ба анҷом расонид.

Яке аз сабабҳои пеш аз муҳлат иҷро гардидани даъват ба зиёд будани ҷавонписарони ихтиёрӣ ва шаҳрвандоне, ки бо гирифтани даъватнома ба комиссариатҳои ҳарбӣ ҳозир мешаванд, марбут мебошад.

Бояд гуфт, ки давлату Ҳукумати ҷумҳурӣ ҳанӯз аз рӯзҳои аввали таъсиси Қувваҳои Мусаллаҳи Тоҷикистон нисбат ба низомиёни мамлакат таваҷҷуҳу дастгирии ҳамаҷониба зоҳир менамояд.

Таҳлилҳо нишон медиҳанд, ки солҳои охир обрӯю нуфузи Қувваҳои Мусаллаҳ  дар байни аҳолӣ, бахусус ҷавонон афзун гашта, онҳо мисли солҳои пешин барои ба хизмати ҳарбӣ рафтан ба комиссияҳои даъватӣ ҳозир мешаванд. Илова бар ин, дар даврони истиқлоли давлатӣ имрӯз дар тамоми қисму воҳидҳои низомии Қувваҳои Мусаллаҳ шароити хизмативу маишӣ ва таълимӣ пурра муҳайё гардида, шаҳрвандон имкон доранд дар фазои сулҳу суботи комил ва дар Ватани азизи худ хизмати пуршарафи сарбозиро адо намоянд.

АКС: Вазорати мудофиаи Ҷумҳурии Тоҷикистон