Дар Тоҷикистон яке аз нодиртарин ҷарроҳӣ дар шараёнҳои майнаи сар гузаронида шуд

ДУШАНБЕ, 14.04.2025. /АМИТ «Ховар»/. Дар Маркази миллии тиббии Тоҷикистон «Шифобахш» бо истифода аз дастгоҳу таҷҳизоти муосири тиббӣ нодиртарин ҷарроҳиҳо дар шараёнҳои майнаи сар муваффақона амалӣ мегарданд.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, табибон як сокини мамлакатро, ки бо нишонаҳои маҳкамшавии тромбоз ва акрузия, яъне маҳкамшавии шараёни хоб бистарӣ гардида буд, ҷарроҳӣ намуданд. Бемор дар ҳолати сактаи майнаи сар, нимфалаҷи тарафи рости бадан, вайроншавии нутқ, тағйири ақл ва рафтор қарор дошт. Чунин амалиёти ҷарроҳӣ маротибаи аввал дар мамлакат гузаронида шуд.

Табиби ҷарроҳи Маркази миллии тиббии Ҷумҳурии Тоҷикистон «Шифобахш» Назрулло Раҳимов иттилоъ дод, ки зимни амалиёти ҷарроҳӣ ба бемор анастомози шараёни болои чакка бо шараёнҳои дохили майнаи сар гузошта шуда, бо ёрии ҷарроҳӣ маҳкамшавии шараёни хоб пурра бартараф карда шуд. Баъд аз ҷарроҳӣ бемор дар ҳолати хуб қарор дошта, ҳаракат дар дасту пой, инкишофи нутқ ва беҳтар гардидани хотираи ӯ дида мешавад.

Баъди муваффақона  гузаронидани чунин амалиёти ҷарроҳӣ минбаъд табобати ин гуна беморон дар мамлакат бештар мегардад.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон