«IRS» бо мақсади пешгирии қонунвайронкунӣ дар масири Душанбе – Чанок гузаргоҳи назоратӣ таъсис дод

ДУШАНБЕ, 28.04.2025. /АМИТ «Ховар»/. Ширкати «IRS» бо мақсади пешгирии қонунвайронкунӣ, аз ҷумла зиёд будани бор аз меъёри муқарраргардида ва ҳаракати автомобилҳои боркаши марбут ба корхонаҳои саноатӣ дар минтақа фаъолиятдошта бе рақамҳои қайди давлатӣ дар масири Душанбе – Чанок гузаргоҳи назоратӣ таъсис дод. Ҳадаф аз таъсиси гузаргоҳи назоратӣ пешгирӣ ва бартараф намудани раванди номатлуби зикршуда мебошад. Дар ин хусус ба АМИТ «Ховар» аз маркази матбуоти «IRS» хабар доданд.

Сарфи назар аз фаъолияти пурмаҳсули кормандони ширкат бинобар аз ҷониби баъзе ронандагон риоя нагардидани қоидаҳои ҳамлу нақли молу маҳсулот вайроншавии роҳи Душанбе –Чанок мунтазам буда, сол то сол тамоюли афзоиш касб намудааст. Дар ин масир садҳо километр роҳ осеби ҷиддӣ дида, филиали ширкат минтақаҳои осебдидаро таъмири куллӣ менамояд. Бинобар ин, «IRS» аз аввали фаъолият таъмири куллӣ ва ҷории роҳро шуруъ карда буд. Дар муддати 15 сол зиёда аз 2,5 миллион метри мураббаи роҳи Душанбе – Чанок таъмиру навсозӣ гардида, бо ин мақсад қариб 400 ҳазор тонна асфалт сарф шуд.

Ҷиддитар намудани назорати нақлиёти гаронвазн аз километри 78 то 136 -уми роҳи Душанбе-Чанок тавассути таъсис додани гузаргоҳи назоратӣ усули навбатии таъсиррасонӣ мебошад. Ҳадафи ширкати «IRS» ба ин восита аз байн бурдани қонуншиканӣ (бо бори аз меъёр зиёд ҳаракат намудани воситаҳои нақлиёт) аст.

Ин иқдом ба иҷрои «Қоидаҳои аз роҳҳои автомобилгард гузаштани воситаҳои нақлиёт бо вазн ва андозаҳое, ки аз меъёрҳои муқарраршуда зиёданд» марбут буда, риояи муқаррароти қоидаҳои гуфташуда аз ҷониби моликону истифодабардагони воситаҳои нақлиёт, новобаста аз шакли моликият ҳатмӣ мебошад.

Ҳадафи дигари ин иқдом, ҳамон тавре зикр шуд, пешгирии идора кардани воситаҳои нақлиёт бе рақами қайди давлатӣ, ки ба баланд бардоштани интизом дар байни иштирокчиёни ҳаракат дар роҳ мусоидат менамояд, маҳсуб мешавад.

Мутобиқи Қонуни Ҷумҳурии Тоҷикистон «Дар бораи ворид намудани тағйироту илова ба Кодекси ҳуқуқвайронкунии маъмурии Ҷумҳурии Тоҷикистон» барои чунин қонуншиканӣ ҷазо — яъне таъйин намудани ҷарима ба андозаи аз сӣ то панҷоҳ нишондиҳанда барои ҳисобҳо ё маҳрум кардан аз ҳуқуқи идора намудани воситаи нақлиёт ба муҳлати як сол муқаррар карда шудааст. Таҳлили масъала аз он дарак медиҳад, ки содиркунии чунин қоидавайронкуниҳо аз ҷониби баъзе ронандагон, хосса воситаҳои нақлиёти боркаши марбут ба корхонаҳои саноатии минтақаҳои Варзобу Зарафшон рӯ ба афзоиш ниҳодааст. Амалия нишон медиҳад, ки ин қабил қоидавайронкуиҳо асосан бо мақсади насупоридани маблағи истифодаи роҳ рух медиҳанд.

Тибқи маълумоти Вазорати нақлиёт, ҳамасола то 20 000 ҳолати аз ҷониби ронандагон риоя накардани қоидаҳои ҳамлу нақли борҳои калонҳаҷм ва вазнин ба қайд гирифта шудааст. Он чиз нигаронкунанда аст, ки мошинҳои гаронвазн бо бори зиёда аз 40 тонна вақтҳои охир роҳҳои бо заҳмату маблағи зиёд сохташударо вайрон карда, ба соҳа хисороти калон мерасонанд.

АКС: Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон