Кишоварзони ноҳияи Фархор дар беш аз 9 ҳазор гектар пунбадона кишт менамоянд

ДУШАНБЕ, 19.04.2025 /АМИТ «Ховар»/. Имсол дар ноҳияи Фархор тибқи нақша дар  9740 гектар  пунбадона  кишт карда мешавад. Дар ин хусус ба АМИТ  «Ховар» аз Мақомоти иҷроияи ҳокимияти давлатии ноҳияи Фархор иттилоъ доданд.

Иттилоъ дода шуд, ки маҷмуи  заминҳои корам  дар ноҳия  24 511  гектарро ташкил дода, аз ин  19000 гектараш  заминҳои корами обӣ  мебошад.

Ҳамчунин дар ноҳия барои таъмини амнияти озуқавории кишоварзон дар 10678  гектар маҳсулоти ғаладонагӣ,   дар 368 гектар картошка,  дар 550 гектар пиёз,  дар 950 гектар сабзавот ва  дар 830  гектар  полезӣ  кишт намудаанд, ки 65 фоизи нақшаро ташкил медиҳад.

Сардори шуъбаи кишоварзии ноҳияи Фархор Маҳмадшариф  Намозов   иброз намуд, ки  «обёрии  саривақтии  қитъаҳои замини  корам  муҳимтарин  омили таъмини   фаровонҳосилӣ дониста мешавад. Дар ноҳияи Фархор  барои обёрии заминҳои корам  5 пойгоҳи  обтаъминкунӣ мавҷуд аст, ки тавассути   ин пойгоҳҳо  5486 гектар  қитъаҳои  замини корам бо оби полезӣ  таъмин карда мешаванд».

Ҳамчунин гуфта шуд, ки дар мавсими обёрӣ   барои сари вақт   бо оби полезӣ  таъмин намудани хоҷагиҳои деҳқонӣ  то имрӯз  дар 32 километр  канал  ва дар 20 километр  заҳбуру  заҳкашҳо  тоза карда шуда,  раванди омодагиҳо  ба мавсими обёрӣ   идома дорад.

АКС: АМИТ «Ховар»