Баҳодур Шерализода раиси Федератсияи шамшербозии Тоҷикистон интихоб гардид

ДУШАНБЕ, 21.05.2025 /АМИТ «Ховар»/. 21 май дар шаҳри Душанбе Маҷлиси умумии ғайринавбатии интихоботии Ташкилоти ҷамъиятии «Федератсияи шамшербозии Тоҷикистон» баргузор гардид. Дар он Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода раиси нави федератсия интихоб шуд. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд.

Тавре Кумитаи миллии олимпии Тоҷикистон хабар медиҳад, Баҳодур Шерализода бо ҷонибдории якдилонаи аъзои федератсия раиси Федератсияи шамшербозии Тоҷикистон интихоб гардид.

Федератсияи байналмилалии шамшербозӣ (FIE), ки соли 1913 таъсис ёфтааст, яке аз куҳантарин ташкилоти варзишии ҷаҳон ба шумор меравад. Қароргоҳи асосии он дар шаҳри Лозаннаи Швейтсария ҷойгир аст. FIE се навъи шамшербозӣ— рапира, шпага ва сабляро фаро гирифта, мусобиқаҳои бузурги ҷаҳонӣ, аз ҷумла чемпионатҳои ҷаҳон, Ҷоми ҷаҳон ва Бозиҳои олимпиро ташкил менамояд.

Шамшербозӣ яке аз панҷ намуди варзиш аст, ки аз нахустин Бозиҳои олимпӣ дар Афина шуруъ аз соли 1896 то имрӯз ҳамеша дар барномаи олимпиадаҳо қарор дорад. Ҳоло ин федератсия беш аз 150 федератсияи миллиро муттаҳид менамояд.

Солҳои охир Федератсияи шамшербозии Тоҷикистон бо дастгирии Кумитаи миллии олимпӣ барои рушди ин навъи варзиш, бахусус дар байни ҷавонон кӯшишҳои зиёд анҷом додааст.

Варзишгарони тоҷик ҳоло дар мусобиқаҳои байналмилалӣ, аз ҷумла бозиҳои Осиё ва чемпионатҳои ҷаҳон барои ҷавонон иштирок намуда, ном ва Парчами давлатии Тоҷикистонро баланд мебардоранд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон