Дар Душанбе байни муассисаҳои таҳсилоти ибтидоӣ ва миёнаи касбӣ даври ниҳоии футболи хурд оғоз ёфт

ДУШАНБЕ, 23.05.2025 /АМИТ «Ховар»/. 22 май дар шаҳри Душанбе  бахшида ба Рӯзи ҷаҳонии футбол даври ниҳоии футболи хурд барои дарёфти «Ҷоми Раиси Кумита оид ба таҳсилоти ибтидоӣ ва  миёнаи касбӣ»,  ки байни муассисаҳои таҳсилоти ибтидоӣ ва миёнаи касбӣ эълон гардида буд, оғоз гардид.

Тавре ба АМИТ «Ховар» аз Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон хабар доданд, ба даври ҷумҳуриявӣ  аз 100 даста 24 даста роҳ ёфт, ки байни ҳам рақобат менамоянд.

Зимни ифтитоҳи мусобиқа  муовини якуми Раиси Кумита оид ба таҳсилоти ибтидоӣ ва миёнаи касбӣ Баҳрулло Давлатзода иброз дошт, ки «футбол яке аз намудҳои машҳуртарини варзиш ба ҳисоб рафта, асоси пойдории дӯстӣ ва сулҳу субот дониста шуда, дар самти ташаккули тарзи ҳаёти солим нақши муҳим мебозад. 7 май Маҷмаи Умумии Созмони Милали Муттаҳид қатънома дар бораи эълон намудани 25 май чун Рӯзи ҷаҳонии футболро, ки аз ҷониби Президенти Ассотсиатсияи футболи Осиёи Марказӣ (CAFA), Президенти Федератсияи футболи Тоҷикистон муҳтарам Рустами Эмомалӣ пешниҳод гардида буд, қабул намуд».

Бозии футбол то 24 май идома ёфта,  дар ҷамъбасти мусобиқа беҳтаринҳо бо туҳфаҳои хотиравӣ, Сипоснома ва Ифтихорномаи кумита сарфароз гардонида мешаванд.

АКС: Кумита оид ба таҳсилоти ибтидоӣ ва миёнаи касби назди Ҳукумати Ҷумҳурии Тоҷикистон