Дар Душанбе намоиши ҷойи кор ва вазифаҳои озод доир шуд

ДУШАНБЕ, 01.05.2025. /АМИТ «Ховар»/. Имрӯз дар Боғи «Куруши Кабир»-и шаҳри Душанбе намоиши калони ҷойи кор ва вазифаҳои озод бо пешниҳоди талаботи корфармоёни дохилӣ ва хориҷи мамлакат, инчунин имконияти касбомӯзӣ аз рӯйи ихтисосҳои ба талаботи бозори меҳнати дохил ва хориҷи ҷумҳурӣ ҷавобгӯ баргузор гардид. Дар ин хусус АМИТ «Ховар» бо истинод ба Вазорати меҳнат, муҳоҷират ва шуғли аҳолии Ҷумҳурии Тоҷикистон иттилоъ медиҳад.

Намоиши калони ҷойи кори холӣ ба Рӯзи байналмилалии якдилии меҳнаткашон (1 май) бахшида шуд.

Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода иброз намуд, ки  мақсади ин рӯз ҳифзи ҳуқуқу манфиатҳои кормандон, мусоид гардонидани шароити меҳнат, муҳайё намудани фазои корӣ ва расидан ба зиндагии шоистаи меҳнаткашон мебошад.

Намоиши ҷойи кори холӣ ва вазифаҳои озод бо фарогирии васеъ ва пешниҳоди ҷойи кори холӣ дар дохили ҷумҳурӣ ва дархосту талаботи корфармоёни хориҷӣ ва ватанӣ доир гардид. Инчунин дар он имконияти омода намудани мутахассисон, яъне ташкили касбомӯзӣ ва забономӯзӣ тибқи талаботи бозори меҳнат, бахусус корфармои хориҷӣ пешниҳод гардид.

Дар намоиш аз ҷониби 100 корхонаи ҷумҳурӣ ва берун аз он зиёда аз 4 ҳазор ҷойи кори холӣ ба шаҳрвандони корҷӯ ва нафароне, ки хоҳиши иваз кардани ҷойи кор ё пайдо намудани кори беҳтарро доранд, пешниҳод гардид.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон