Дар Шанхай вохӯрии роҳбарони сохторҳои минтақавӣ оид ба ҳолатҳои фавқулодаи минтақаҳои наздимарзии давлатҳои аъзои СҲШ доир гардид

ДУШАНБЕ, 13.05.2025 /АМИТ «Ховар»/. 12 май дар Шанхай вохӯрии 8-уми роҳбарони сохторҳои минтақавӣ оид ба ҳолатҳои фавқулодаи минтақаҳои наздимарзии давлатҳои аъзои Созмони ҳамкории Шанхай баргузор гардид. Мулоқот таҳти раёсати Ҷумҳурии Мардумии Чин баргузор шуд.

Тавре АМИТ «Ховар» бо истинод ба котиботи Созмони ҳамкории Шанхай дар Пекин хабар дод, дар ҳамоиш намояндагони мақомоти соҳавии давлатҳои аъзои Созмони ҳамкории Шанхай, инчунин вакилони Муғулистон, Амороти Муттаҳидаи Араб ва Дафтари пекинии барномаи Созмони Милали Муттаҳид оид ба иттилооти кайҳонӣ ҳангоми ҳолатҳои фавқулода ва бартарафнамоии офатҳои табиӣ (UN-SPIDER) иштирок намуданд.

Масъалаҳои таҳкими ҳамкорӣ дар самти огоҳӣ ва рафъи оқибатҳои ҳолатҳои фавқулода дар навоҳии наздисарҳадӣ, баланд бардоштани омодагӣ ба вокуниш ба хатарҳои фаромарзӣ, такмили механизмҳои табодули иттилоот ва баргузории машқҳои муштарак баррасӣ шуданд.

Иштирокчиён ҳавасмандияшонро ба рушди минбаъдаи ҳамкории амалӣ, табодули таҷриба ва амалияи пешқадам дар соҳаи мудофиаи гражданӣ тасдиқ намуда, барои афзун намудани ҳамоҳангсозии кӯшишҳо дар доираи механизмҳои вокуниши минтақавӣ изҳори омодагӣ карданд.

АКС: Котиботи Созмони ҳамкории Шанхай дар Пекин