Дар Тоҷикистон оид ба дарки коррупсия таҳқиқоти маҷмуии сотсиологӣ анҷом дода шуд

ДУШАНБЕ, 12.05.2025. /АМИТ «Ховар»/. Вобаста ба дарки коррупсия аз тарафи ҷомеа дар Ҷумҳурии Тоҷикистон таҳқиқоти маҷмуии сотсиологӣ анҷом дода шуд, ки дар он 10 ҳазор нафар иштирок намуданд. Дар ин хусус АМИТ «Ховар» бо истинод ба Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар медиҳад.

Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар ҳамбастагӣ бо Маркази тадқиқоти стратегии назди Президенти Ҷумҳурии Тоҷикистон, вазорату идораҳо ва мақомоти иҷоияи ҳокимияти давлатӣ бо сокинони гуногункасби 28 шаҳру ноҳияи мамлакат оид ба дарки коррупсия аз тарафи ҷомеа дар Ҷумҳурии Тоҷикистон таҳқиқоти маҷмуии сотсиологӣ анҷом дод.

Ин таҳқиқот дар асоси банди 69-и Нақшаи чорабиниҳои амалисозии «Стратегияи давлатии муқовимат ба коррпусия дар Ҷумҳурии Тоҷикистон барои давраи то соли 2030» барои марҳилаи якум (солҳои 2021-2025) ва банди 3 Нақшаи кории Шурои миллии муқовимат бо коррупсияи Ҷумҳурии Тоҷикистон анҷом дода шуд.

Бояд гуфт, ки «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» ва Нақшаи чорабиниҳои амалисозии он ҳамчун санади меъёрии ҳуқуқӣ аҳамияти умумиҳатмӣ дошта, барои иҷро ба вазорату идораҳо, мақомоти иҷроияи маҳаллии ҳокимияти давлатӣ, корхона, муассиса ва дигар ташкилоти давлатӣ дастрас карда шудааст.

Муҳлати амалӣ намудани Стратегия барои давраи то соли 2030 пешбинӣ карда шуда, нақшаи чорабиниҳои татбиқи он ба ду марҳилаи панҷсола, яъне марҳилаи якум барои солҳои 2021-2025 ва

марҳилаи дуюм, ки он дар панҷсолаи дуюм тасдиқ карда мешавад, ҷудо карда шудааст. Ҳамзамон барномаи стратегия аз 5 боб ва 195 банд иборат буда, дар стратегия мақсад, вазифа ва принсипҳои амалигардонии стратегия, самтҳои асосӣ, механизми амалигардонӣ, мониторинг ва баҳодиҳии он оварда шудаанд.

АКС аз манбаъҳои боз