Дар Тсюрих имконоти сармоягузории Тоҷикистон дар соҳаи нассоҷӣ муаррифӣ карда шуд

ДУШАНБЕ, 22.05.2025 /АМИТ «Ховар»/. 20 май дар шаҳри Тсюрих Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария Шараф Шерализода дар чорабинии Федератсияи байналмилалии молистеҳсолкунандагони нассоҷӣ (ITMF) иштирок ва имконоти сармоягузории соҳаро муаррифӣ намуд.

 Тавре ба АМИТ «Ховар» аз Сафорати Ҷумҳурии Тоҷикистон дар Конфедератсияи Швейтсария хабар доданд, Шараф Шерализода оид ба дастовардҳои мамлакат дар соҳаи саноати нассоҷӣ ва рушди иқтисодиёти “сабз”, инчунин имконоти сармоягузорӣ дар ин соҳа ба иштирокчиён маълумот пешниҳод намуд.

Дар чорабинӣ ассотсиатсияҳои пешсаф ва ширкатҳои бонуфузи  ҷаҳонии соҳаи нассоҷӣ тақрибан аз 50 давлати дунё иштирок намуданд. Ҳамзамон  дар фарҷоми чорабинӣ Сафири Ҷумҳурии Тоҷикистон иштирокчиёни чорабиниро ба Форуми якуми байналмилалии нассоҷӣ (Тоҷикистон 2025) ва Намоишгоҳи дастгоҳу таҷҳизот ва маҳсулоти нассоҷӣ, ки 8-10 июли соли 2025 дар шаҳри Душанбе баргузор мегарданд, даъват намуд.

АКС: Сафорати Ҷумҳурии Тоҷикистон дар Конфедератсияи Швейтсария