КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Имрӯз дар доираи он форумҳои пешазконфронсӣ ва чорабиниҳои фарҳангӣ доир мешаванд
ДУШАНБЕ, 29.05.2025 /АМИТ «Ховар»/. Имрӯз дар пойтахти Тоҷикистон — шаҳри Душанбе дар доираи Конфронси байналмилалии сатҳи баланд оид ба ҳифзи пиряхҳо, ки аз 29 то 31 май баргузор мегардад, форумҳо ва чорабиниҳои канорӣ оғоз меёбанд. Дар ин хусус хабарнигори АМИТ «Ховар» бо истинод ба Вазорати корҳои хориҷии ҷумҳурӣ иттилоъ медиҳад.
Ин конфронс дар доираи Соли байналмилалии ҳифзи пиряхҳо доир мегардад, ки бо ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон эълон шудааст.
Дар чаҳорчӯби конфронс 8 форуми мавзуӣ, 18 чорабинии канорӣ (сайд-ивентҳо), 12 ҷаласаи мавзуӣ, Фестивали пиряхҳо, намоишгоҳҳои байналмилалӣ ва 2 ҷаласаи пленарӣ гузаронида мешаванд.
Бегоҳи имрӯз дар доираи Конфронси байналмилалии сатҳи баланд оид ба ҳифзи пиряхҳо дар майдони «Наврӯзгоҳ»-и пойтахт барномаи фарҳангии «Нидои лозур» баргузор мешавад.
Ба иштирокчиёни чорабинӣ — сокинон ва меҳмонони шаҳри Душанбе намоишгоҳи ҳунарҳои мардумӣ пешниҳод мегардад. Ҳунармандони моҳир гулдӯзӣ, бофандагӣ, заргарӣ, кулолгарӣ, маҳсулоти нонӣ ва таомҳои миллиро ба намоиш мегузоранд.
Ғайр аз ин барномаи фарҳангӣ пешниҳод мешавад, ки дар он сурудҳо ва рақси миллии тоҷикӣ дар иҷрои гурӯҳҳои беҳтарини ҷумҳурӣ иҷро хоҳанд шуд.
Иштироки муовинони президентҳои Эрон, Зимбабве, Гамбия ва Малдив, муовинони сарвазирони Озарбойҷон, Лесото ва Булғористон, 12 вазири кишварҳои хориҷӣ, раҳбарони сохторҳои Созмони Милали Муттаҳид, ба мисли WMO, UNESCAP, UNICEF ва Намояндаи махсуси Созмони Милали Муттаҳид оид ба масъалаҳои об тасдиқ шудааст. Ҳамчунин Дабири кулли Иттиҳоди Давлатҳои Мустақил, Дабири кулли Созмони ҳамкории Шанхай ва 24 роҳбари дигар ташкилоти минтақавӣ низ дар конфронс иштирок хоҳанд кард. Барои иштирок дар ин чорабинӣ тақрибан 2,5 ҳазор нафар аз беш аз 80 давлат ба қайд гирифта шудаанд.
Интизор меравад, ки конфронс ба рӯйдоди муҳими ҷаҳонӣ дар самти таҳияи қарорҳои байналмилалӣ оид ба ҳифзи пиряхҳо ва мубориза бо тағйирёбии иқлим— масъалаҳое, ки сол ба сол шадидтар ва муҳимтар мегарданд, табдил ёбад.
Ёдовар мешавем, ки конфронс дар доираи Соли байналмилалии ҳифзи пиряхҳо баргузор мешавад, ки бо ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 14 декабри соли 2022 дар иҷлосияи 77-уми Маҷмаи Умумии Созмони Милали Муттаҳид пешниҳод шуда, аз ҷониби беш аз 150 кишвари аъзои Созмони Милали Муттаҳид дастгирӣ ёфт.
АКС: АМИТ «Ховар»
Ҳайати Тоҷикистон дар чорабинии сатҳи баланд: «Муттаҳидӣ ба хотири об: даъват ба амали дастҷамъӣ» иштирок намуд
Тоҷикистон дар Ню-Йорк ҳамоиши сатҳи баланд оид ба ҳифзи пиряхҳо ва таҳкими устувории иқлим баргузор намуд
Сироҷиддин Муҳриддин нақши фаъоли Тоҷикистонро дар доираи СММ ва саҳми ташаббусҳои байналмилалӣ таъкид намуд
Ба ифтихори дохил гардидани Резервати биосферии Ромит ба Шабакаи ҷаҳонии мамнуъгоҳҳои биосферии ЮНЕСКО конфронс доир шуд
«РАВАНДИ ОБИ ДУШАНБЕ». Барои Тоҷикистон ин дастоварди дипломатӣ ва масъулияти бузург аст
Оид ба омӯзиши яхбандии абадӣ экспедитсияи байналмилалии илмӣ-таҳқиқотӣ анҷом дода шуд
ПИРЯХШИНОСӢ ДАР 35 СОЛИ ИСТИҚЛОЛ. Оид ба марҳилаҳои эҳё, рушд ва пешсафии ин соҳа дар арсаи ҷаҳон
35 тавсифи пурарзиши Президенти Тоҷикистон дар ситоиши Истиқлолияти давлатӣ
ҶОИЗАИ БАЙНАЛМИЛАЛИИ АБӮАЛӢ ИБНИ СИНО: МУАРРИФИИ МИЛЛАТИ АРҶГУЗОР БА ИЛМУ ДОНИШ. Мулоҳизаҳо дар ин хусус
ИСТИҚЛОЛИЯТ — РАМЗИ САОДАТ ВА АСОЛАТИ МИЛЛАТ. Тавсифҳои истиқлолият аз суханҳои пурарзиши Президенти Тоҷикистон
НУРИ ХУРШЕДИ ИСТИҚЛОЛ ТО АБАД РАВШАНГАРИ ҲАЁТИ ҶОМЕАИ МО БОД! Тавсифҳои истиқлолият аз суханҳои пурарзиши Президенти Тоҷикистон
ИСТИФОДАИ ДУРУСТИ ЗЕҲНИ СУНЪӢ. Андешаҳо дар ин маврид
