Муассисаҳои тиббии Тоҷикистон бо таҷҳизоти муосир таъмин карда мешаванд

ДУШАНБЕ, 13.05.2025. /АМИТ «Ховар»/. 73 муассисаи нигоҳубини неонаталӣ (дастгоҳи махсус барои нигоҳубини кӯдакони навзоди бармаҳал ё камвазн) дар Тоҷикистон бо таҷҳизоти муосир таъмин карда мешаванд.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, дар муассисаҳои нигоҳубини неонаталӣ доир ба истифодаи таҷҳизот даврҳои омӯзишӣ гузаронида мешаванд.

Аз ҷониби намояндагии ЮНИСЕФ дар Ҷумҳурии Тоҷикистон ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон 227 мошини CИПАП (таҷҳизот барои таъмини фишори пайвастаи мусбати роҳҳои нафас) ва 300 консентрати оксигенӣ бо лавозимоти иловагӣ тақдим гардид.

Ин таҷҳизоти тиббӣ ба такмил ва баланд бардоштани иқтидори соҳа дар пешниҳоди ёрии тиббии марбут ба ҳалли мушкилоти роҳҳои нафаси навзодон ва таъмини чунин таҷҳизот ба шахсони эҳтиёҷманд нигаронида шудааст.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон