Ноиби Президенти Бонки Осиёии рушд НБО «Роғун»-ро ҳамчун рамзи пешрафт ва ояндаи дурахшони минтақа арзёбӣ намуд

ДУШАНБЕ, 29.05.2025 /АМИТ «Ховар»/. Ноиби Президенти Бонки Осиёии рушд Ингминг Янг бо корҳои сохтмонӣ дар Неругоҳи барқи обии «Роғун» шинос шуд. Дар ин хусус ба АМИТ «Ховар» аз Неругоҳи барқи обии «Роғун» хабар доданд.

Ноиби Президенти Бонки Осиёии рушд дар Неругоҳи барқи обии «Роғун» бо ҷараёни корҳои сохтмонӣ ва иқтидори энергетикии он шинос шуда, нақши калидии неругоҳро дар таъмини амнияти энергетикии Тоҷикистон ва минтақа баланд арзёбӣ намуд.

Ҳамчунин ҳайати Бонки Осиёии рушд бо ҷузъиёти татбиқи лоиҳаи иншооти аср, тарҳрезии муҳандисӣ, тадбирҳои муҳофизати муҳити зист ва саҳми он дар рушди устувори иқтисодии кишвар шинос гардид.

Дар фарҷом Ингминг Янг ба Китоби ифтихории Неругоҳи барқи обии «Роғун — Кохи Нур» соядаст гузошта, аз шиносоӣ бо иншооти беназири энергетикӣ изҳори қаноатмандӣ намуд.

Ӯ неругоҳи «Роғун»-ро ҳамчун рамзи умед, рушду пешрафт ва ояндаи дурахшони минтақа арзёбӣ кард.

АКС: Неругоҳи барқи обии «Роғун»