«Саёҳати бузург тавассути Осиёи Марказӣ». Сафари иттилоотии намояндагони ВАО-и Чин ва Осиёи Марказӣ дар Тоҷикистон оғоз шуд

ДУШАНБЕ, 29.05.2025 /АМИТ «Ховар»/. 28 май дар шаҳри Душанбе сафари иттилоотии «Саёҳати бузург тавассути Осиёи Марказӣ» ифтитоҳ гардид, ки дар он намояндагони воситаҳои ахбори оммаи Чин ва кишварҳои Осиёи Марказӣ  иштирок намуданд. Дар ин хусус мухбири АМИТ «Ховар» хабар медиҳад.

Муовини сардори Раёсати робитаҳои байналмилалии Вазорати нақлиёти Ҷумҳурии Тоҷикистон Суҳроби Нурулло иброз дошт, ки «имрӯз муносибатҳои Ҷумҳурии Тоҷикистон ва Ҷумҳурии Мардумии Чин дар сатҳи баланд қарор доранд. Чин дар татбиқи лоиҳаҳои сохтмони роҳҳои автомобилгард нақши муҳим мебозад. Мо умед дорем, ки ин ҳамкорӣ дар оянда низ рушду густариш меёбад».

Намояндагони Ҷумҳурии Мардумии Чин ба мардуми Тоҷикистон барои истиқболи гарму меҳмоннавозӣ изҳори сипос намуда, баён доштанд, ки баргузории чунин чорабиниҳо ба таҳкими робитаҳо байни ду давлат мусоидат карда, саҳми назарраси роҳбарони давлатҳоро дар рушди ҳамкории дуҷониба инъикос менамояд.

Ёдовар мешавем, ки соли равон  дар Ҷумҳурии Қазоқистон таҳти унвони «Чин – Осиёи Марказӣ» ҳамоиши муҳими байналмилалӣ баргузор хоҳад шуд. Бо назардошти аҳамияти ин рӯйдод ва бо мақсади ба намоиш гузоштани дастовардҳо дар татбиқи эъломияи нахустин ҳамоиш, инчунин имконияти васеи ҳамкорӣ байни Чин ва кишварҳои Осиёи Марказӣ шабакаи телевизионии CGTN тасмим гирифтааст, ки як лоиҳаи муштараки таҳқиқотиро таҳти унвони «Саёҳати бузург тавассути Осиёи Марказӣ» дар ҳамкорӣ бо воситаҳои ахбори оммаи пешсафи кишварҳои минтақа амалӣ намояд.

Ин лоиҳа дар давраи моҳҳои май-июн амалӣ мегардад. Ҳадафи он инъикоси равандҳои ҳамкории минтақавӣ, инчунин намоиши саҳми кишварҳо дар таҳкими муносибатҳои дӯстона ва рушди устувор мебошад.

Файзалӣ ҚУРБОНЗОДА,
АМИТ «Ховар»

АКС: АМИТ «Ховар»