Дар мавзуи «Нақши Ваҳдати миллӣ дар рушди иқтисоди миллӣ ва сайёҳию соҳибкорӣ» ҳамоиш баргузор шуд

ДУШАНБЕ, 16.06.2025. /АМИТ «Ховар»/. Ваҳдати миллӣ роҳро ба сӯи давлатдории муосир ва ташаккули ҷомеаи шаҳрвандӣ боз намуд. Чунин иброз гардид дар ҳамоише, ки бахшида ба 28-умин солгарди Рӯзи Ваҳдати миллӣ дар Институти илмию таҳқиқотии сайёҳӣ ва соҳибкории Донишгоҳи байналмилалии сайёҳӣ ва соҳибкории Тоҷикистон дар мавзуи «Нақши Ваҳдати миллӣ дар рушди иқтисоди миллӣ ва сайёҳию соҳибкорӣ» баргузор шуд. Дар ин хусус АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон иттилоъ медиҳад.

Дар ҳамоиш олимону мутахассисон аз муассисаҳои таҳсилоти олии касбии мамлакат иштирок карда, масъалаҳои муҳимми марбут ба таҳкими сулҳу субот, рушди устувори иқтисодӣ, эҳёи инфрасохтори сайёҳӣ ва густариши соҳибкориро дар ҷумҳуриро баррасӣ намуданд.

Иброз гардид, ки маҳз ваҳдат омили асосии рушди устувори иқтисодию иҷтимоӣ ва муаррифи Тоҷикистони соҳибистиқлол дар арсаи байналмилалӣ гардид. Таъкид шуд, ки сиёсати пешгирифтаи Пешвои миллат муҳтарам Эмомалӣ Раҳмон дар самти таҳкими ваҳдат, ба сулҳу мусоидат намуд.

Дар интиҳо иштирокдорони ҳамоиш иброз намуданд, ки ваҳдати миллӣ ва сулҳу субот имрӯз ба сифати арзиши олӣ, заминаи таҳкими истиқлолият ва омили калидии рушди иқтисоди миллӣ хизмат менамояд.

АКС: Донишгоҳи байналмилалии сайёҳӣ ва соҳибкории Тоҷикистон