Эла Ионеску, намоянда аз Руминия: «Шумо, одамони хушбахтед, ки чунин Ватани зебо доред»

Июнь 1, 2025 14:00

ДУШАНБЕ, 01.06.2024. /АМИТ «Ховар»/. «Ман нахустин маротиба аст, ки дар Тоҷикистон қарор дорам. Дар ҳақиқат, Тоҷикистон дорои захираҳои бойи оби тоза ва табиати нотакрор аст. Ба бисёр кишварҳои ҷаҳон сафар ва бисёр маконҳои зебою афсонавиро тамошо кардаам, аммо дар хеҷ куҷо ба мисли обҳои Тоҷикистон, дарёҳои мусаффо ва табиати афсункорро надидаам. Шумо, одамони хушбахтед, ки чунин Ватани зебо доред», — чунин иброз намуд намояндаи Руминия Эла Ионеску зимни суҳбат ба хабарнигори АМИТ «Ховар», ки ҳайати меҳмононро баъди Конфронси байналмилалии сатҳи баланд оид ба ҳифзи пиряҳо ба сайри шаҳри Норак ҳамроҳӣ менамуд.

Ҳамсуҳбати мо афзуд, ки «се рӯз мешавад аз мавзеъҳои зебои Тоҷикистон ба дӯстонам аксҳо равон дорам. Ин зебогиҳоро дида, онҳо дар ҳайрат мондаанд. Бо дӯстонам тасмим гирифтем, ки ин тобистон ҳатман ба Тоҷикистон оем. Махсусан, ба тамошои баҳри Норак меоем, ки ба инсон эҳсоси аҷиби оромӣ мебахшад. Кас аз тамошои оби каб –кабуди он миёни кӯҳҳо сер намешавад».

Дар ин сафар Эла Ионеску ва дигар меҳмонон маконҳои таърихӣ, иншооти истеҳсолиро тамошо карда, аз пазироии самимии мардуми сарбаланди Тоҷикистон, боду ҳавои форам, табиати нотакрори ин сарзамин, обҳои мусаффои ҷонбахшаш таассуроти нек бардоштанд ва ба Тоҷикистон муҳаббат баста, ба мардуми меҳмоннавози он баҳои баланд доданд.

Ҳамчунин ҳамсуҳбати мо иброз дошт, ки «Тоҷикистон барои ҷалби сайёҳон имконияти зиёд доштааст. Танҳо зарур аст, ки он васеъ тарғиб карда шавад. Бубинед, ман, ки маротиба аввал дар ин сарзамин ҳастам, ба ватани худ нарасида, аллакай нақша дорам, ба ин сарзамини офтобӣ ба муҳлати дарозтар омада, дигар минтақаҳои онро ҳатман тамошо намоям. Аз ин имкониятҳо бояд истифода бурд».

Имрӯз меҳмонон ва иштирокчиёни Конфронси байналмилалии сатҳи баланд оид ба ҳифзи пиряхҳо бо иншооти муҳими стратегии Тоҷикистон — Неругоҳи барқи обии «Норак» шинос шуданд. Инчунин агрегатҳо ва осорхонаи ин иншооти бузурги гидроэнергетикиро тамошо намуданд. Ба меҳмонон доир ба таърих ва фаъолияти неругоҳ маълумот дода шуд.

Иттилоъ дода шуд, ки агрегати якуми Неругоҳи барқи обии «Норак» 53 сол муқаддам — соли 1972 ба истифода дода шуда, моҳи декабри соли 1979 агрегати охирини неругоҳ барои истеҳсоли неруи барқ мавриди истифода қарор гирифт. Дар бунёди ин иншооти бузурги стратегию энергетикӣ намояндагони 50 халқу миллатҳои гуногуни ҷаҳон саҳм гузоштаанд. Неругоҳи барқи обии «Норак» бо истеҳсоли неруи барқи аз лиҳози экологӣ тоза барои пешрафти саноати мамлакат заминаи мусоид фароҳам овард.

Моҳинави НАВРӮЗ,
АМИТ «Ховар»

АКС: АМИТ «Ховар»

Июнь 1, 2025 14:00

Хабарҳои дигари ин бахш

Беш аз 46 ҳазор сайёҳи дохилию хориҷӣ бо мавзеъҳои зебои Данғара шинос гардиданд
РУШДИ САЙЁҲӢ. Имсол ба вилояти Хатлон беш аз 900 ҳазор сайёҳ ташриф овардааст
Раванди омодагӣ ба Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор» баррасӣ шуд
Пешвои миллат Эмомалӣ Раҳмон дар ҳудуди ноҳияи Данғара ба таври фосилавӣ Маркази хизматрасонии сайёҳӣ ва зиёда аз 50 километр роҳҳои мумфаршгардидаро ифтитоҳ намуданд
Имсол беш аз 30 ҳазор сайёҳон бо мавзеъҳои таърихии ноҳияи Восеъ шинос гардиданд
Дар нуҳ моҳ беш аз 1,5 миллион сайёҳ мавзеъҳои ҷолиби Тоҷикистонро тамошо намуданд
Алӣ Ғиёсуддин Муҳаммад: «Тоҷикистон имкон дорад бо истифода аз захираҳои табиӣ ба яке аз давлатҳои пешрафтаи ҷаҳон табдил гардад»
«САЙРИ МЕҲРГОН». Дар доираи ин хатсайр меҳмонони хориҷӣ бо таъриху суннатҳои ин ҷашни бостонӣ шинос шуданд
«САЙРИ МЕҲРГОН». Дар Душанбе ба макони таҷлили ин ҷашн хатсайри сайёҳии ройгон ташкил карда мешавад
Дар Донишгоҳи давлатии Хоруғ оид ба тағйирёбии иқлим ва пешгирии обшавии пиряхҳо ҳамоиши илмӣ доир гардид
«ДУШАНБЕ ИНВЕСТ-2025». Иштирокдорони Форуми байналмилалии сармоягузорӣ «Қалъаи Ҳисор»-ро тамошо намуданд
Сулаймон Зиёзода дар Муколамаи Рим оид ба масъалаҳои об-2025 мавқеи Тоҷикистонро дар самти истифодаи устувори захираҳои об таъкид намуд