Дар Душанбе истифода ва ҳифзи захираҳои обии мамлакат дар шароити тағйирёбии иқлим баррасӣ гардид

ДУШАНБЕ, 18.03.2026 /АМИТ «Ховар»/. «Истифода ва ҳифзи захираҳои обии мамлакат дар шароити тағйирёбии иқлим: ҳолати кунунӣ ва дурнамо»- таҳти чунин унвон дар шаҳри Душанбе бахшида ба Даҳсолаи байналмилалии амал «Об барои рушди устувор, солҳои 2018–2028» ва Рӯзи ҷаҳонии об конфронси илмӣ-амалӣ баргузор гардид, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар конфронси илмӣ-амалӣ муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Исфандиёр Шукурзода доир ба ташаббусҳои Ҳукумати Ҷумҳурии Тоҷикистон дар самти обу иқлим ва ҳифзи пиряхҳо сухан намуд. Гуфта шуд, ки Тоҷикистон беш аз ду даҳсола боз бо назардошти афзун гардидани таваҷҷуҳи ҷомеаи ҷаҳонӣ ба масъалаҳои об ва муҳимияти захираҳои обӣ барои ноил гардидан ба рушди устувор масъалаҳоро вобаста ба об дар рӯзномаи ҷаҳонии рушд пеш бурда, тавсеа мебахшад.

Дар конфронс намояндагони ниҳодҳои гуногуни мамлакат тадбиру амалҳои нақшавиро дар доираи ҳадафҳои Даҳсолаи байналмилалии амал «Об барои рушди устувор, солҳои 2018-2028» бо маърузаю рӯнамоҳо пешниҳод намуданд.

Иброз гардид, ки чунин ҳамоишҳои илмӣ-амалӣ метавонанд ба ҳамкории судманд, табодули таҷриба, ҳалли ҳамгироёнаи масъалаҳои обу экология ва иқлим мусоидат намоянд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон