ФУТБОЛ. Дастаи мунтахаби олимпии Тоҷикистон (U-23) бо ҳамсолони худ аз Ҳиндустон ва Қирғизистон бозиҳои дӯстона анҷом медиҳад

ДУШАНБЕ, 04.06.2025 /АМИТ «Ховар»/. Дастаи мунтахаби олимпии Тоҷикистон (U-23) оид ба футбол дар доираи омодагӣ ба марҳилаи интихобии Ҷоми Осиё-2026 бо ҳамсолони худ аз Ҳиндустон ва Қирғизистон ду бозии дӯстона анҷом медиҳад.

Тавре ба АМИТ «Ховар» аз Федератсияи футболи Тоҷикистон хабар доданд, аз 18 то 24 июн дар Варзишгоҳи марказии Ҳисор силсилаи бозиҳои дӯстона байни дастаҳои олимпии Тоҷикистон, Қирғизистон ва Ҳиндустон баргузор мешавад.

18 июн мунтахаби олимпии Тоҷикистон бо дастаи Ҳиндустон бозӣ мекунад. Пас аз се рӯз, 21 июн дар Ҳисор бозӣ байни тимҳои олимпии Қирғизистону Ҳиндустон баргузор мешавад. Ва ниҳоят, 24 июн дастаҳои олимпии Тоҷикистону Қирғизистон бо ҳам бозии дӯстона мегузаронанд.

Ҳамаи бозиҳо дар Варзишгоҳи марказии Ҳисор баргузор шуда, соати 20:00 оғоз мешаванд.

АКС: Федератсияи футболи Тоҷикистон