Ҳамкории илмию таҳлилии Тоҷикистон ва Олмон густариш меёбад

ДУШАНБЕ, 17.07.2025. /АМИТ «Ховар»/. Директори Маркази тадқиқоти стратегии назди Президенти Ҷумҳурии Тоҷикистон Хайридин Усмонзода бо Сафири Фавқулода ва Мухтори Ҷумҳурии Федеративии Олмон дар Ҷумҳурии Тоҷикистон Йорк Шуграф вохӯрӣ намуд. Дар ин хусус ба АМИТ «Ховар» аз Маркази тадқиқоти стратегӣ хабар доданд.

Дар мулоқот ҷонибҳо оид ба вазъи кунунӣ ва дурнамои ҳамкории дуҷонибаи Тоҷикистон ва Олмон табодули назар карда, густариши минбаъдаи равобити ҳарду давлатро дар арсаҳои мавриди таваҷҷуҳи ҷонибҳо муҳим арзёбӣ намуданд.

Сафири Олмон ҳамкории мутақобили судмандро барои рушди робитаҳои илмию пажӯҳишӣ бо Маркази тадқиқоти стратегии назди Президенти Ҷумҳурии Тоҷикистон муҳим арзёбӣ намуд.

Ҷонибҳо барои тавсеа ва тақвияти ҳамкории илмӣ–таҳлилӣ изҳори ҳавасмандӣ намуданд.

АКС: Маркази тадқиқоти стратегӣ назди Президенти Ҷумҳурии Тоҷикистон