Ҳамкории Тоҷикистон ва Амороти Муттаҳидаи Араб дар соҳаи авиатсияи гражданӣ баррасӣ шуд

ДУШАНБЕ, 16.07.2025 /АМИТ «Ховар»/. Имрӯз мулоқоти Директори Агентии авиатсияи граждании назди Ҳукумати Ҷумҳурии Тоҷикистон Ҳабибулло Назарзода бо Вазири иқтисод ва сайёҳӣ, Раиси Мақомоти федеролии авиатсияи граждании Амороти Муттаҳидаи Араб Абдулло ибни Тавқ Ал-Маррӣ доир гардид.

Дар оғози мулоқот ҷониби Тоҷикистон таъкид намуд, ки зери роҳбарӣ ва таваҷҷуҳи пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон соҳаи авиатсияи гражданӣ ба пешрафтҳои назаррас ноил гардида, барои афзун намудани шумораи хатсайрҳои ҳавоӣ ва беҳтар гардондани сифати хизматрасонии авиатсионӣ тадбирҳои зарурӣ андешида мешаванд.

Зимни мулоқот ҷонибҳо доираи васеи масъалаҳои ҳамкории дуҷонибаро, хусусан дар соҳаи авиатсияи гражданӣ бо ҳадафи рушди ҳамкории иқтисодӣ ва рушди сайёҳӣ мавриди баррасӣ қарор доданд.

Аз ҷумла ҷонибҳо масъалаи ифтитоҳи хатсайри Душанбе-Шарҷа ва Душанбе-Абузабиро баррасӣ намуданд.

Таъкид гардид, ки айни замон байни Душанбе ва Дубай хатсайри мустақими ҳавоӣ фаъол аст, ки аз ҷониби ширкатҳои ҳавоии «Сомон Эйр» ва «FlyDubai» анҷом дода мешавад.

Ҷонибҳо омодагии худро барои таҳкими бештари ҳамкорӣ дар самти афзоиши шумораи парвозҳо ва соддагардонии раванди сафарҳо иброз намуданд.

Ёдовар мешавем, ки ҳайати Амороти Муттаҳидаи Араб таҳти роҳбарии Вазири иқтисод ва сайёҳӣ, Раиси Мақомоти федеролии авиатсияи гражданӣ Абдулло ибни Тавқ Ал-Маррӣ бо мақсади иштирок дар Форуми иқтисодию сармоягузории Тоҷикистону Амороти Муттаҳидаи Араб дар шаҳри Душанбе қарор дорад.

Дар доираи Форуми иқтисодию сармоягузории Тоҷикистону Амороти Муттаҳидаи Араб имзои Созишномаи ҳамкорӣ оид ба алоқаи ҳавоӣ байни ду давлат дар назар дошта шудааст.