Барои кормандони мақомоти молияи шаҳру ноҳияҳои Тоҷикистон машварати омӯзишӣ гузаронида шуд

ДУШАНБЕ, 18.07.2025 /АМИТ «Ховар»/. 17 июл дар ноҳияи Варзоб бо иштироки намояндагони Сарраёсати сиёсати андоз ва пардохтҳои давлатии Вазорати молияи Ҷумҳурии Тоҷикистон ва роҳбарону кормандони бахши даромадҳои давлатии мақомоти молия дар шаҳру ноҳияи тобеи ҷумҳурӣ машварати омӯзишӣ баргузор шуд. Дар ин хусус АМИТ «Ховар» бо истинод ба Вазорати молия хабар медиҳад.

Дар машварат масъалаҳои тақвият бахшидани раванди таҳияи лоиҳаи қисми даромади буҷети давлатӣ барои солҳои 2026-2028 бо назардошти ислоҳоти охирини қонунгузории андозу буҷет, таҳлили манбаъҳои воқеии даромад, такмили механизмҳои пешгӯии нишондиҳандаҳои қисми даромади буҷети давлатӣ мавриди таҳлилу баррасӣ қарор гирифтанд. Инчунин тартиби дуруст воридсозии рақамҳои назоратии даромади буҷети давлатӣ дар Низоми иттилоотии идоракунии молияи давлатӣ, ҷанбаҳои амалии тағйироти воридгардида ба қонунгузории андоз ва татбиқи онҳо баррасӣ шуданд.

Иштирокчиёни машварат дар муҳокима фаъолона иштирок намуда, ба саволҳояшон вобаста ба таҳияи лоиҳаи даромади буҷети давлатӣ ва дигар масъалаҳои амалии фаъолияти молиявӣ посухҳои мушаххас гирифтанд.

Таъкид гардид, ки баргузории чунин машваратҳо ба баланд бардоштани сатҳи тахассусии кормандони мақомоти молия ва беҳтарсозии раванди таҳияи буҷети давлатию маҳаллӣ мусоидат менамояд.

АКС: Вазорати молияи Ҷумҳурии Тоҷикистон