Дар вилояти Хатлон гардиши савдои хориҷӣ ба 210,2 миллион доллар баробар гардид

ДУШАНБЕ, 15.07.2025 /АМИТ «Ховар»/. Дар шаш моҳи соли равон ҳаҷми гардиши савдо дар вилояти Хатлон ба 8 миллиарду 55 миллион сомонӣ ва ҳаҷми хизматрасонии пулакӣ ба 1 миллиарду 418,2 миллион сомонӣ баробар гардид, ки нисбат ба ҳамин давраи соли 2024 мутаносибан 8 ва 6 банди фоизӣ афзоиш ёфтааст. Дар ин хусус зимни ҷаласаи навбатии Мақомоти иҷроияи ҳокимияти давлатии вилояти Хатлон иттилоъ дода шуд.

Дар ҷаласа натиҷаҳои рушди иқтисодию иҷтимоии вилоят дар нимаи якуми соли 2025 мавриди таҳлил ва баррасии амиқ қарор гирифтанд.

Иброз гардид, ки дар 6 моҳи соли 2025 гардиши савдои хориҷӣ ба 210,2 миллион доллари амрикоӣ баробар гардид. Аз он 82,3 миллион доллар ё 39 фоиз содирот ва 127,8 миллион доллар ё 61 фоиз воридоти молу маҳсулот мебошад.

Иттилоъ дода шуд, ки ба ҳолати 1 июни соли 2025 дар вилоят 32 431 ҷойи кор таъсис дода шуда, музди миёнаи меҳнат дар вилоят ба 2192 сомонӣ баробар гардид. Ин нисбат ба ҳамин давраи соли 2024 30,4 фоиз зиёд мебошад.

Дар нимаи якуми соли равон ҳаҷми истеҳсоли маҳсулоти умумии кишоварзӣ ба 14 миллиарду 69,6 миллион сомонӣ баробар шудааст.

Тибқи маълумоти оморӣ, дар ҳамаи бахшҳои хоҷагидории вилоят дар 346 299 гектар зироати кишоварзӣ кишт шудааст, ки 104,7 фоизи дурнаморо ташкил медиҳад.

АКС: Мақомоти иҷроияи ҳокимияти давлатии вилояти Хатлон