ИМРӮЗ — РӮЗИ КОРМАНДОНИ СОҲАИ СОХТМОН. Бинокоронро ободгари зиндагии мардум меноманд

ДУШАНБЕ, 10.08.2025 /АМИТ «Ховар»/. Якшанбеи дуюми моҳи август дар Тоҷикистон Рӯзи кормандони соҳаи сохтмон маҳсуб  мешавад. Соли равон дар мамлакат дар масоҳати умумии 526,9 ҳазор метри мураббаъ хонаҳои истиқоматӣ ба истифода дода шуданд.

Дар остонаи ин иди касбӣ Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода дар суҳбат бо хабарнигори АМИТ «Ховар» гуфт, ки «Рӯзи сохтмончиён иди касбҳои сершумор -муҳандисон, лоиҳакашон, коргарон, кафшергарон ва таҳқиқгарон мебошад, ки тибқи Қонуни Ҷумҳурии Тоҷикистон «Дар бораи рӯзҳои ид» ҳамасола якшанбеи дуюми моҳи август гузаронида мешавад. Обрӯ ва эътибори сохтмончиёни мамлакат ва касби сохтмончӣ сол ба сол баланд мегардад, зеро аксари офаридаҳои беҳтарину мондагор аз ҷониби соҳибони ҳамин касб ба вуҷуд омадаанд. Шаҳрҳои зебо ва иншооти бузурги меъморӣ — мактабу донишгоҳҳо, беморхонаву истироҳатгоҳҳо, қасрҳои бошукуҳи фарҳанг ва варзишгоҳҳо, хонаҳои истиқоматии замонавӣ ва кохҳои дилрабо, меҳмонхонаву китобхонаҳо ва садҳо иншооти иҷтимоиву фарҳангӣ бо дастони пурэъҷози бинокорон бунёд шудаанд».

Бояд гуфт, ки ифтихори мардуми бунёдкору меҳнатдӯст, соҳибтамаддуну фарҳангофарини тоҷик, хусусан сохтмончиёни мамлакат аст, ки Ҷумҳурии соҳибистиқлоли Тоҷикистон маҳз бо ибтикору дастгириҳои пайвастаи Президенти Ҷумҳурии Тоҷикистон муҳтарам Эмомалӣ Раҳмон, ки меъмори ҳамаи ободкориву созандагиҳо дар мамлакат мебошад, ба дастовардҳои барҷастаи сиёсиву иқтисодӣ ва иҷтимоиву фарҳангӣ ноил гардидааст.

Низом Мирзозода афзуд, ки сохтмончиёнро ободгари шароити зиндагии мардум меноманд, зеро ягон соҳаи ҳаёти ҷомеа ва иқтисодиёт бе сохтмон тараққӣ намекунад. «Ҳукумати Ҷумҳурии Тоҷикистон барои рушду нумӯи соҳаи сохтмон пайваста ғамхорӣ зоҳир менамояд. Ин ғамхорӣ ба ҳадафҳои беҳтар сохтани сифати бунёди иншооти таъйиноти гуногун, татбиқи меъмории миллӣ дар ҳамбастагӣ бо стандартҳои замонавӣ, омӯзиши таҷрибаи пешқадами кишварҳои хориҷӣ, ба танзим даровардани низоми шаҳрсозӣ ва риояи қатъии қоидаҳои он равона шудааст»,-гуфт Раиси Кумита.

Бунёди иншооту биноҳои замонавӣ, равшансозии кӯчаҳо, сохтмони муассисаҳои варзишӣ, мактабҳо ва кӯдакистонҳо, корхонаҳои истеҳсолӣ, инчунин шинонидани гулу дарахтони ороишӣ – ҳама ин тадбирҳо дар самти ободонии пойтахт бо вусъати бесобиқа ба роҳ монда шудаанд. Имрӯз шаҳри Душанбе бо симои зебо ва ободу муосир ба яке аз марказҳои муҳими рушди мамлакат табдил ёфта, ифтихори ҳар сокини пойтахт маҳсуб мешавад.

Имрӯзҳо сохтмончиёни тоҷик масъулияти бузурге бар дӯш доранд, зеро дар Тоҷикистон то баргузории ҷашни 35-солагии Истиқлолияти давлатии Ҷумҳурии Тоҷикистон бунёди садҳо бинову иншоот ба нақша гирифта шудааст. Ин аст, ки барои иҷрои қарори Ҳукумати Ҷумҳурии Тоҷикистон  «Дар бораи ҷашни 35-солагии Истиқлоли давлатии Ҷумҳурии Тоҷикистон» тадбирҳои зарурӣ андешида, корҳои сохтмонию ободонӣ дар иншооте, ки ба истифода додани онҳо дар шаҳру ноҳияҳои ҷумҳурӣ ба муносибати ҷашни 35-солагии Истиқлолияти давлатии Ҷумҳурии Тоҷикистон ба нақша гирифта шудаанд, зери назорат қарор доранд.

Тавре Низом Мирзозода иттилоъ дод, ба пешвози ҷашни 35-солагии Истиқлоли давлатии Ҷумҳурии Тоҷикистон дар ҷумҳурӣ дар маҷмуъ сохтмони 29 919 иншоот ба нақша гирифта шудааст. Дар айни замон 23 228 инишоот ба истифода супорида шуда, дар 4594 иншоот корҳо идома доранд.

«Кумита барои бо сатҳу сифати баланд бунёд гардидани бинову иншоот ба муносибати ҷашни 35-солагии Истиқлоли давлатии Ҷумҳурии Тоҷикистон, сари вақт бо ҳуҷҷатҳои лоиҳавӣ таъмин намудани муроҷиаткунандагон ва аз экпертизаи давлатӣ гузаронидани лоиҳаҳои иншоот, инчунин дастгирии ташаббусҳои созандаи соҳибкорон пайваста тадбир меандешад»,-афзуд Низом Мирзозода.

Иттилоъ дода шуд, ки дар шашмоҳаи аввали соли равон  мактабҳои таҳсилоти умумӣ барои 10 697 хонанда, дармонгоҳ барои 368 ҷойи қабул дар як баст ва муассисаҳои томактабӣ барои 510 ҷой ба истифода дода шуданд.

Ҳамзамон иброз гардид, ки Кумита бо мақсади таъмини ҳолати ба зилзила тобовар будани биною иншоот, санҷиши мехсутуну асосҳои бино ва иншоот дар шаҳру ноҳияҳои ҷумҳурӣ озмоишгоҳи махсусгардонидаю муҷаҳҳаз  бо таҷҳизоти муосири замонавии истеҳсоли Федератсияи Русияро таъсис додааст. Санҷиши мехсутунҳо дар майдони сохтмонӣ тибқи талабот, тартиб ва меъёру қоидаҳои сохтмонӣ амалӣ карда мешавад. Мақсади асосии санҷиш муайян намудани қобилияти борбардории мехсутунҳо мебошад, ки баъди санҷиш бо натиҷаи ҳисоби конструктивӣ муқоиса карда мешаванд.

Дар айни замон 65 маркази шаҳру ноҳияҳои мамлакат пурра бо нақшаҳои генералӣ таъмин мебошанд. Дар айни замон дар кумита таҳия ва тасҳеҳи нақшаҳои генералӣ ва лоиҳаҳои муфассали банақшагирии шаҳру ноҳияҳо идома дорад.

Ҳамзамон бояд гуфт, ки Пажӯҳишгоҳи лоиҳакашӣ ва корхонаҳои воҳиди давлатӣ дар шашмоҳаи якуми соли равон ба маблағи 21 миллиону 724 ҳазору 355 сомонӣ корҳои лоиҳакашӣ, хизматрасонӣ, ҷустуҷӯию таҳқиқотиро ба анҷом расониданд. Ин ба 116,9 фоизи ҳамин давраи соли 2024 баробар аст.

Воқеан, ягон соҳаи иқтисодиёт бе  сохтмон рушд намеёбад. Иштироки фаъолонаи сохтмончиён дар корҳои созандагию бунёдкорӣ  ҳамчун таҷассуми дастовардҳои таърихи халқамон марҳалаи тозаи худшиносӣ ва ваҳдату ифтихори миллӣ мегардад. Ин барои таҳкими асосҳои давлату давлатдорӣ ва ободии сарзамини аҷдодиамон бисёр муҳим ва пурқимат аст.

Шаҳлои САДРИДДИН,
АМИТ «Ховар»

АКС аз манбаъҳои боз