НИШАСТИ МАТБУОТӢ. Дар Тоҷикистон 222 ҳодиса ва ҳолатҳои фавқулода ба қайд гирифта шуд

ДУШАНБЕ, 04.08.2025. /АМИТ «Ховар»/. Дар шашмоҳаи якуми соли 2025 дар ҷумҳурӣ 222 ҳодиса ва ҳолатҳои фавқулодаи табиӣ ба қайд гирифта шудааст, ки нисбат ба ҳамин давраи соли 2024   310 адад кам мебошад. Дар ин хусус имрӯз зимни нишасти матбуотӣ Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Раҷабалӣ Раҳмоналӣ ба хабарнигорон иттилоъ дод.

Зимни нишасти матбуотӣ иброз гардид, ки дар давраи ҳисоботӣ 78 ҳодисаи селфароӣ, 18 бориши борон, 51 ҳодисаи тармафароӣ, 6 ҳолати баландшавии сатҳи об, 21 ҳодисаи сангрезӣ, 19 заминларза, 6 ҳолати фаромадани ярч, 17 ҳолати вазиши шамоли сахт, 4 ҳолати раъду барқ, 1 ҳодисаи бориши барфи зиёд ва 1 ҳодисаи хунукии сахт ба қайд гирифта шудааст.

Иброз шуд, ки бо мақсади пешгирии офатҳои табиӣ, андешидани тадбирҳои иловагӣ барои вусъат бахшидани корҳои пешгирикунанда дар шашмоҳаи якуми имсол аз ҷониби Кумита Нақшаи чорабиниҳо оид ба пешгирии ҳолатҳои фавқулода дар давраи мавсими баҳору тобистони соли 2025 таҳия шуда, ба воҳидҳои сохтории вилоятӣ ва шаҳру ноҳиявии кумита ирсол гардид.

«Дар ин замина бо иштироки масъулини шаҳру ноҳияҳои ҷумҳурӣ дар мавзеъҳои хавфнок ва минтақаҳое, ки эҳтимоли рух додани ҳолатҳои фавқулодаро доранд, ситодҳои доимӣ ва дар ҳудуди ҷамоатҳои деҳот аз ҳисоби кормандони ташкилоту корхона ва зернизомҳои ҳудудӣ ва вазифавии Низоми ягонаи давлатӣ оид ба пешгирӣ ва рафъи ҳолатҳои фавқулода навбатдории шабонарӯзӣ ташкил гардидааст. Танҳо соли 2025  154 машқи ғайринақшавӣ бо гузаронидани машқҳои махсуси тактикӣ дар мавзеъҳои хавфнок бо ҷалби 30 164 нафар аҳолӣ ва зиёда аз 889 техника гузаронида шуд»,-изҳор дошт Раҷабалӣ Раҳмоналӣ.

Моҳинави НАВРӮЗ,
АМИТ «Ховар»

АКС: АМИТ «Ховар»