Дар шаҳри Новосибирски Русия гӯшаи забон ва адабиёти тоҷик ифтитоҳ ёфт

ДУШАНБЕ, 22.09.2025. /АМИТ «Ховар»/. 20 сентябр бо ташаббуси Консулгарии генералӣ ва мусоидати Китобхонаи миллии Тоҷикистон, Китобхонаи марказии илмии Академияи миллии илмҳои Тоҷикистон ба номи Индира Гандӣ дар назди муассисаи консулӣ гӯшаи забон ва адабиёти тоҷик ифтитоҳ гардид.

Гӯша бо зиёда аз 900 адад китобҳои тозанашр, аз ҷумла китобҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, шоирону нависандагони классику муосир, ба монанди «Шоҳнома», «Маснавии маънавӣ», «Гулистон»-у «Бӯстон» ва дигар китобҳо бо забонҳои тоҷикӣ ва русӣ таъмин шудааст.

Ба ин муносибат дар Консулгарии генералӣ чорабинии Рӯзи забон, адабиёт ва фарҳанг тоҷик баргузор шуд, ки дар он намояндагони соҳаи маориф ва илми минтақаи иқомат, роҳбарони диаспораи тоҷик, донишҷӯён ва ҳамватанони бурунмарзӣ иштирок намуданд.

Консули генералӣ Наҷмиддин Имомзода оид ба арҷгузорӣ ба забон, таъриху фарҳанг ва тамадуни миллӣ, ташаббусҳои созандаи Пешвои миллат ба ҷавонон барои омӯзиши илму инноватсия, инчунин пешгирӣ аз ҷалби онҳо ба гурӯҳу созмонҳои ифротӣ ва террористӣ сухан гуфта, даъват намуд, ки барои муаррифии бештари забон ва фарҳанги тоҷик саҳмгузор бошанд.

Ёдовар мешавем, ки дар гӯшаи мазкур барои омӯзиши забони тоҷикӣ ва тоҷикшиносӣ шароит фароҳам гардида, он ҷиҳати тарғибу ташвиқи забони тоҷикӣ дар минтақаи Сибир ва Шарқи Дури Федератсияи Русия, таъмини ҳамватанон бо китобҳои дарсӣ, дастурҳои методӣ, адабиёти бадеӣ ва матбуоти даврӣ бо забони давлатӣ мусоидат менамояд.