Дар Тошканд ҷаласаи машваратии давлатҳои наздисоҳилӣ доир ба маблағгузории устувори лоиҳаи НБО «Роғун» баргузор гардид

ДУШАНБЕ, 29.09.2025 /АМИТ «Ховар»/. Дар шаҳри Тошканд бо иштироки муовини Сарвазири Ҷумҳурии Тоҷикистон Усмоналӣ Усмонзода ҷаласаи машваратии давлатҳои наздисоҳилӣ доир ба маблағгузории устувори лоиҳаи Неругоҳи барқи обии «Роғун» баргузор гардид, иттилоъ медиҳад АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Узбекистон.

Зимни ҷаласа, ки дар он намояндагони Бонки ҷаҳонӣ ва коршиносону масъулини Ҳукумати Ҷумҳурии Узбекистон иштирок доштанд, масъалаҳои маблағгузории устувори Неругоҳи барқи обии «Роғун», инчунин ҳамкорӣ дар бахши обу энергетика ва экология бо кишварҳои поёноб баррасӣ гардиданд.

Муовини Сарвазири мамлакат Усмоналӣ Усмонзода зимни суханронӣ нақши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дар бунёди Неругоҳи барқи обии «Роғун» муҳим арзёбӣ намуд.

Дар ҷаласа намояндаи минтақавии Бонки ҷаҳонӣ, машваратчиён ва масъулони вазорату идораҳои Ҷумҳурии Тоҷикистон ва Ҷумҳурии Узбекистон доир ба масъалаҳои баррасишаванда сухан гуфтанд.

Ҷаласа то 30 сентябр идома меёбад.

АКС: Сафорати Ҷумҳурии Тоҷикистон дар Ҷумҳурии Узбекистон