ИСТИҚЛОЛИЯТ — ҚИМАТТАРИН НЕЪМАТИ ЗИНДАГӢ. Дар мақомоти Ваколатдор оид ба ҳуқуқи инсон ҳамоиши идона баргузор шуд

ДУШАНБЕ, 06.09.2025 /АМИТ «Ховар»/. Имрӯз дар Мақомоти Ваколатдор оид ба ҳуқуқи инсон дар Ҷумҳурии Тоҷикистон бахшида ба 34-солагии Истиқлолияти давлатии Ҷумҳурии Тоҷикистон ҳамоиш доир гардид, хабар медиҳад мухбири АМИТ «Ховар».

Ваколатдор оид ба ҳуқуқи инсон дар Ҷумҳурии Тоҷикистон Умед Бобозода дар ҳамоиш аз дастовардҳои бузурги даврони соҳибистиқлолӣ давоми 34 сол ёдовар шуда, гуфт, ки «имрӯз аз файзу баракати истиқлолияту соҳибихтиёрӣ мардуми тоҷик дар ҷодаи рушди устувор бо азму иродаи қавӣ барои ободию осоиштагии ин сарзамин қадам мезанад».

Ба андешаи Ваколатдор, фарорасии чунин солгард ҳам аз назари эҳсоси баланди ватандӯстӣ, ҳам аз диди сарнавишту арзишҳои миллӣ ва ҳам аз нигоҳи раванди таърихии давлатсозӣ яке аз муҳимтарин рӯйдодҳои таърихи давлатдории муосири миллии мо мебошад. «Ифтихор аз таърих, фарҳанг, забон ва анъанаҳои наҷибу ҷовидонаи миллат рукни бисёр муҳимми истиқлолияти давлатӣ мебошад. Дар ин замина моро мебояд минбаъд низ сарҷамъу муттаҳид бошем ва неъмати қиматтарини зиндагиамон- истиқлолу озодиро ҳимоя кунем, дастоварди бузургтарини даврони истиқлол сулҳу оромӣ, суботи сиёсӣ ва ваҳдати миллиро боз ҳам таҳкиму тақвият бахшем», — афзуд Умед Бобозода.

Иброз гардид, ки ин истиқлолият имкон медиҳад, ки дар канори ибрози эҳсоси олӣ ҳамчунин ба роҳи тайшуда назар андохта, бурду бохт ва дастовардҳои ин марҳилаи муҳими таърихи давлатдориамонро ҷамъбаст ва арзёбӣ намоем.

Сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангии дастгоҳи Ваколатдор оид ба ҳуқуқи кӯдак дар Ҷумҳурии Тоҷикистон Талабшоҳ Шарифзода оид ба рушди равандҳои муҳими ҳуқуқи инсон дар даврони истиқлолият, паҳлуҳои таърихӣ, сиёсӣ ва ҳуқуқии Истиқлоли давлатӣ, дастовардҳои Тоҷикистон дар самти ҳуқуқу озодиҳои инсон ва тақвияти сулҳу суботи ҷомеа изҳори назар намуд. Иброз гардид, ки истиқлол ва мавҷудияти аркони давлатдорӣ ба Тоҷикистон имкон дод, то дар арсаи байналмилалӣ эътироф гардад ва ташаббусҳои Роҳбари давлат дар сатҳи миллӣ, минтақавӣ ва байналмилалӣ мавриди таваҷҷуҳ қарор гирифта, ҳамовозию дастгирӣ ёбанд.

«Амалӣ шудани ҳуқуқу озодиҳои инсон ва шаҳрванд, пеш аз ҳама, ба он асос меёбад, ки онҳо дар Конститутсия, қонунҳо ва дигар санадҳои меъёрии ҳуқуқӣ инъикос ёфтаанд ва иҷрои онҳо кафолат дода мешавад. Арзишҳои олӣ, ки дар Конститутсия ба сифати рукнҳои бунёдии давлати соҳибистиқлоли Тоҷикистон эътироф шудаанд, меҳвари фаъолияти давлат ва мақомоти онро ташкил медиҳанд»,-гуфт Талабшоҳ Шарифзода.

Маърузачиён дар ҳамоиш изҳор намуданд, ки расидан ба истиқлолияти давлатӣ аз дастовардҳои бузург ва арзанда ба ҳисоб рафта, бузургтарин неъмати миллати тоҷик дар тамоми давраҳо мебошад. Тоҷикистон танҳо тавассути Истиқлолияти давлатӣ ба дастовардҳои бузург ноил гардид, ки қарнҳои дароз орзую омоли миллат маҳсуб мешуданд. Истиқлолияти давлатӣ барои мо имкон фароҳам овард, ки роҳи имрӯзу ояндаи миллату давлатро ба сӯи ҷомеаи демократӣ, ҳуқуқбунёд ва дунявӣ интихоб намоем.

Шаҳлои САДРИДДИН,
АМИТ «Ховар»

АКС: АМИТ «Ховар»