«МАН БА ХИЗМАТ МЕРАВАМ». Таҳти ин унвон дар вилояти Хатлон иқдоми ҳизбӣ доир гардид

ДУШАНБЕ, 29.09.2025. /АМИТ «Ховар»/. Бо ташаббуси Кумитаи иҷроияи Ҳизби Халқии Демократии Тоҷикистон дар вилояти Хатлон ва Ташкилоти ҷамъиятии ҷавонон «Созандагони Ватан» дар вилоят таҳти унвони «Ман ба хизмат меравам» иқдоми ҳизбӣ баргузор гардид. Дар ин хусус ба АМИТ «Ховар» аз Кумитаи иҷроияи Ҳизби Халқии Демократии Тоҷикистон дар вилояти Хатлон хабар доданд.

Ҳадафи иқдом ҳавасманд намудани ҷавононе аст, ки дар даъвати тирамоҳӣ аз ҷониби кумитаҳои иҷроияи Ҳизби Халқии Демократии Тоҷикистон дар шаҳру ноҳияҳои вилояти Хатлон ҳамчун сарбози ихтиёрӣ ба сафи Қувваҳои Мусаллаҳи Ҷумҳурии Тоҷикистон ҷалб карда мешаванд.

Дар ин иқдом ҷавонони ихтиёрие иштирок намуданд, ки аз ҷониби кумитаҳои иҷроияи Ҳизби Халқии Демократии Тоҷикистон дар шаҳру ноҳияҳои минтақаи Бохтар ба хизмат ҷалб гардидаанд.

Раиси Кумитаи иҷроияи Ҳизби Халқии Демократии Тоҷикистон дар вилояти Хатлон Ҷамшед Саидзода иброз намуд, ки бо мақсади роҳнамоии ҷавонон ба шуҷоатмандию далерӣ, дӯст доштани Ватан ва инчунин баланд бардоштани эҳсоси ватандӯстии онҳо Кумитаи иҷроияи Ҳизби Халқии Демократии Тоҷикистон дар вилояти Хатлон пайваста чунин ташаббусҳо ва чорабиниҳои сиёсию фарҳангӣ доир менамояд.

«Воқеан ҳифзи марзу буми мамлакат, ҳимояи манфиатҳои давлат, таҳкими истиқлолият, амният ва иқтидори мудофиавии он вазифаи муқаддаси ҳар шаҳрванд мебошад. Хушбахтона, имрӯзҳо дар заминаи Истиқлоли давлатӣ ва талошҳои ҳамҷонибаи Роҳбари давлат ва ҳукумати ҷумҳурӣ дар қисмҳои низомӣ таъмин бо хӯрок, машқу тамрин ва шароити буду бош хеле беҳтар гардидааст»,-баён дошт ӯ.

АКС аз манбаъҳои боз