Тоҷикистон ба даҳгонаи давлатҳои амнтарини ҷаҳон шомил шуд

ДУШАНБЕ, 20.09.2025 /АМИТ «Ховар»/. Тибқи гузориши «Global Safety Report – 2025»-и Пажуҳишгоҳи амрикоии афкори умум «Gallup», Тоҷикистон дар қатори амнтарин давлатҳои ҷаҳон дар ҷойи дуюм қарор гирифт. Мувофиқи натиҷаҳои назарсанҷӣ, ки дар 142 кишвар гузаронида шудааст, 95% аҳолии кишвар ҳангоми сайругашти шабона худро комилан дар амн эҳсос менамоянд, хабар медиҳад АМИТ «Ховар».

Дар  даҳгонаи кишварҳои амнтарини ҷаҳон Сингапур (98%), Тоҷикистон (95%), Чин (94%), Умон (94%), Арабистони Саудӣ (93%), Кувайт (91%), Норвегия (91%), Баҳрайн (90%) ва Аморати Муттаҳидаи Араб (90%) қарор гирифтанд.

Ин дастовард далели равшани он аст, ки дар партави сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон кишвари мо ба макони сулҳ, субот ва оромии ҷомеа табдил ёфтааст.

Бояд гуфт, ки имрӯз амнияту суботи ҷомеа, фазои ороми шаҳрҳову деҳот, инчунин меҳмоннавозии анъанавии тоҷикона аз ҷониби ҷомеаи ҷаҳонӣ ҳамчун арзишҳои олӣ эътироф шудаанд.

Солҳои охир Тоҷикистон байни давлатҳои ҷаҳон борҳо ба даҳгонаи кишварҳои амнтарин шомил гардидааст. Ин далел собити он аст, ки ҷомеаи байналмилалӣ натиҷаҳои сиёсати муваффақонаи роҳбарияти Тоҷикистонро  дар самти таъмини субот, ҳимояи ҳуқуқи шаҳрвандон ва таҳкими тартиботи ҷамъиятӣ баланд арзёбӣ мекунад.

Ҷой гирифтани Тоҷикистон дар байни кишварҳое, ки ҳамчун пешсафони ҷаҳонӣ дар самти амнияти ҷамъиятӣ эътироф шудаанд, на танҳо дастоварди сиёсати дохилиро инъикос мекунад, балки ба ташаккули нуфузи мусбати кишвар дар арсаи байналмилалӣ мусоидат менамояд.