Дар Институти фалсафа, сиёсатшиносӣ ва ҳуқуқ таҳти унвони «Конститутсия — санади олии ҳуқуқӣ» конференсия баргузор шуд

ДУШАНБЕ, 31.10.2025 /АМИТ «Ховар»/. Имрӯз дар Институти фалсафа, сиёсатшиносӣ ва ҳуқуқи ба номи А.Баҳоваддинови Академияи миллии илмҳои Тоҷикистон таҳти унвони «Конститутсия — санади олии ҳуқуқӣ» конференсияи ҷумҳуриявии илмӣ-назариявӣ баргузор шуд, хабар медиҳад АМИТ «Ховар» бо истинод ба ин институт.

Дар маърӯзаҳои олимон масъалаҳои муҳими таъсири Конститутсия ба низоми сиёсӣ-ҳуқуқӣ, таҳкими арзишҳои конститутсионӣ, нақши Конститутсия дар рушди қонунгузорӣ ва илмҳои ҳуқуқӣ таъкид гардид.

Гуфта шуд, ки Конститутсияи Ҷумҳурии Тоҷикистон ҳамчун рамзи соҳибистиқлолӣ, ваҳдат ва адолати иҷтимоӣ дар тамоми марҳилаҳои рушди давлатдорӣ аҳамияти хоса дошта, риоя ва татбиқи устувори меъёрҳои он заминаи асосии пешрафти давлати миллӣ мебошад.

Иштирокчиён андешаҳои худро оид ба татбиқи меъёрҳои конститутсионӣ, зарурати баланд бардоштани сатҳи маърифати ҳуқуқии ҷомеа, ҳамоҳангсозии меъёрҳои ҳуқуқии миллӣ бо қонунгузории байналмилалӣ ва таҳкими волоияти қонун иброз намуданд.

Пешниҳод гардид, ки натиҷаҳои илмии конференсия барои такмили барномаҳои таълимӣ ва таҳияи тавсияҳои илмӣ-амалӣ истифода шаванд.

АКС: Институти фалсафа, сиёсатшиносӣ ва ҳуқуқи ба номи А.Баҳоваддинов